കൊച്ചി: ശബരിമല സ്വര്ണക്കൊള്ളയില് കേസെടുക്കാനുള്ള നടപടികള് ഇ ഡി തുടങ്ങി. ഇതിന്റെ ഭാഗമായി ഇസിഐആര്( എന്ഫോഴ്സ്മെന്റ് കേസ് ഇന്ഫര്മേഷന് റിപ്പോര്ട്ട്) രജിസ്റ്റര് ചെയ്യാന് അനുമതി തേടി, കൊച്ചിയിലെ ഇ ഡി അധികൃതര് ദല്ഹിയിലെ ആസ്ഥാനത്തേക്ക് കത്തയച്ചു. സ്വര്ണക്കൊള്ളയിലെ കള്ളപ്പണം വെളുപ്പിക്കലും മറ്റു സാമ്പത്തിക ഇടപാടുകളുമാണ് ഇ ഡി അന്വേഷിക്കുക, സ്വര്ണക്കൊള്ള അന്വേഷിക്കാന് കൊല്ലം വിജിലന്സ് കോടതി വ്യാഴാഴ്ചയാണ് ഇ ഡിക്ക് അനുമതി നല്കിയത്. കേസിന്റെ മുഴുവന് രേഖകളുടെയും പകര്പ്പുകള് ഇ ഡിക്ക് നല്കാനും കോടതി നിര്ദ്ദേശിച്ചിരുന്നു.
കഴിഞ്ഞ ദിവസം ബോര്ഡ് മുന് പ്രസിഡന്റ് എന്. വാസു, ഡെപ്യൂട്ടി ദേവസ്വം കമ്മീഷണര് മുരാരി ബാബു, തിരുവാഭരണം മുന് കമ്മീഷണര് കെ.എസ്. ബൈജു എന്നിവരുടെ ജാമ്യാപേക്ഷകള് ഹൈക്കോടതി തള്ളിയിരുന്നു. ഇവരെ ജാമ്യത്തില് വിട്ടയക്കുന്നത് അന്വേഷണത്തെ തടസ്സപ്പെടുത്തുമെന്നും ദൈവത്തിന്റെയും ലക്ഷക്കണക്കിന് ഭക്തരുടെയും താല്പ്പര്യങ്ങള്ക്ക് ഹാനികരമാകുമെന്നമാണ് ജസ്റ്റിസ് എ. ബദറുദീന് പറഞ്ഞത്.
ജാമ്യം നിഷേധിക്കുന്നതിന് കാരണമായി, അന്വേഷണ ഉദ്യോഗസ്ഥന്റെ റിപ്പോര്ട്ടില് പരാമര്ശിച്ചിരിക്കുന്ന ഒരു സംഭവവും ഹൈക്കോടതി എടുത്തു പറഞ്ഞു. 2019 ജൂണ് 17 ന് വിലപിടിപ്പുള്ള വസ്തുക്കള് സ്വര്ണം പൂശാന് അനുമതി തേടി മുരാരി ബാബുവിന് പോറ്റിയില് നിന്ന് അപേക്ഷ ലഭിച്ചപ്പോള്, സ്വര്ണം പൂശിയതായി വിവരിച്ചിരിക്കുന്ന വസ്തുക്കള് അവഗണിച്ച്, ചെമ്പ് എന്ന് വിശേഷിപ്പിച്ച് ഉടന് തന്നെ അവ നീക്കം ചെയ്യാന് അദ്ദേഹം ശിപാര്ശ ചെയ്തുവെന്ന് കോടതി ചൂണ്ടിക്കാട്ടി.
പ്രതികള് ചൂണ്ടിക്കാണിച്ച ആരോഗ്യപ്രശ്നങ്ങള് ജാമ്യം അനുവദിക്കുന്നതിന് അര്ഹതയുള്ളതല്ലെന്നും ഹൈക്കോടതി വ്യക്തമാക്കി. പ്രമേഹം, രക്താതിമര്ദ്ദം തുടങ്ങിയ പ്രായവുമായി ബന്ധപ്പെട്ട അവസ്ഥകളും മരുന്നുകളുടെ ആവശ്യകതയും ജാമ്യത്തിന് മതിയായ കാരണങ്ങളല്ലെന്നും ജയില് അധികാരികള്ക്കോ അന്വേഷണ ഏജന്സിക്കോ ഉചിതമായ വൈദ്യസഹായം നല്കുന്നതിലൂടെ അത്തരം അവസ്ഥകള് മതിയായ രീതിയില് കൈകാര്യം ചെയ്യാന് കഴിയുമെന്നും ബെഞ്ച് നിരീക്ഷിച്ചു.
