കൊച്ചി: സ്ഥിരമായി പ്രശ്നങ്ങള് ഉണ്ടാക്കുന്നയാളാണ് എസ്എച്ച്ഒ കെ.ജി. പ്രതാപചന്ദ്രന്. നിരവധി പരാതികള് ഇയാള്ക്കെതിരെ ഉയര്ന്നിരുന്നു. ചോദിക്കുന്നതിനു മറുപടി പറഞ്ഞാലും പറഞ്ഞില്ലെങ്കിലും അടി എന്നതാണ് സ്വഭാവമെന്നാണ് ദുരനുഭവം നേരിട്ടിട്ടുള്ളവര് പറയുന്നത്. ‘മിന്നല് പ്രതാപന്’ എന്നാണ് അറിയപ്പെടുന്നത്.
2023ല് സുഹൃത്തായ വനിതാ എസ്ഐയെ കാണാനെത്തിയ നിയമവിദ്യാര്ത്ഥി പ്രീതി രാജ് ഉള്പ്പെടെ നിരവധി പേര്ക്ക് ദുരനുഭവം ഉണ്ടായിട്ടുണ്ട്. സുഹൃത്തായ വനിതാ എസ്ഐ വന്നില്ലായിരുന്നെങ്കില് അയാള് ഷൈമോളെ അടിച്ചതു പോലെ എന്നെയും അടിച്ചേനെ എന്ന് പ്രീതി മാധ്യമങ്ങളോട് പറഞ്ഞു. പോലീസ് മേധാവി മുതല് താഴേക്കുള്ളവര്ക്ക് പരാതി നല്കിയിട്ടും ഒന്നുമുണ്ടായില്ലെന്നും മനസുമടുത്തെന്നും പ്രീതി പറഞ്ഞു.
2023 ഏപ്രിലില് ആയിരുന്നു മാന്പവര് സപ്ലൈ കമ്പനിയില് ജീവനക്കാരനായ റിനീഷിനെ പ്രതാപചന്ദ്രന് മര്ദിച്ചത്. ജോലി ചെയ്യുന്നതിനിടെ ഉച്ചയ്ക്ക് കൊടുംചൂടില് വിശ്രമിക്കാനായി എറണാകുളം നോര്ത്ത് പാലത്തിനടിയിലെ തണലില് ഇരുന്നതാണ് റിനീഷ്. രണ്ടു പോലീസുകാര് അടുത്തെത്തി എന്താണ് ഇവിടെ ഇരിക്കുന്നത് എന്നു ചോദിച്ചു. അവരോട് സംസാരിച്ചുകൊണ്ടിരിക്കെ പ്രതാപചന്ദ്രന് വന്നു. പിന്നെ കൈ ചുരുട്ടി മുഖത്തടിക്കുകയായിരുന്നുവെന്ന് റിനീഷ് പറഞ്ഞു. ഇതിനെ എതിര്ത്തതോടെ വീണ്ടും വീണ്ടും തല്ലി.
2023 ജൂലൈയിലാണ് പ്രതാപചന്ദ്രന്റെ പേരിലുള്ള അടുത്ത പരാതി. ചേരാനല്ലൂര് തൃപ്പൂണിത്തുറ റൂട്ടില് സര്വീസ് നടത്തിയിരുന്ന ബസ് ബാനര്ജി റോഡില് വച്ച് ഒരു കാറിനു പിന്നില് ഇടിച്ചു. കാറുകാരന് പെട്ടെന്ന് ചവിട്ടിയതാണ് അപകടകാരണമെന്ന് ബസ് ഡ്രൈവര് അജ്മലും കണ്ടക്ടര് ജിഷ്ണുരാജും പറഞ്ഞു. തുടര്ന്ന് ഇരു കൂട്ടരും നോര്ത്ത് സ്റ്റേഷനിലെത്തി. തങ്ങള് നേരിട്ടത് ക്രൂരമര്ദനമാണെന്ന് സിറ്റി പോലീസ് കമ്മിഷണര്ക്ക് നല്കിയ പരാതിയില് ഇരുവരും ചൂണ്ടിക്കാട്ടിയിരുന്നു.
പാലക്കാട് സ്വദേശികളും സിനിമ പ്രവര്ത്തകരുമായ സനൂപും രാഹുല് രാജും സിനിമയുടെ പ്രവര്ത്തനവുമായി ബന്ധപ്പെട്ടാണ് 2023ല് കൊച്ചിയിലെത്തുന്നത്. ജോലിക്കു ശേഷം രാത്രി ഒരു മണിയോടെ പുറത്തിറങ്ങിയ ഇരുവരേയും നോര്ത്ത് സ്റ്റേഷനില് നിന്നുള്ള ഏഴോളം പോലീസുകാര് വളഞ്ഞു. എവിടെയാടാ മരുന്ന് (ലഹരി) വച്ചിരിക്കുന്നത് എന്നാണ് ആദ്യത്തെ ചോദ്യം. അത്തരം കാര്യങ്ങള് ഉപയോഗിക്കാറില്ലെന്നു പറഞ്ഞതോടെ എവിടെനിന്ന് അടിച്ചോണ്ടു വന്നതാടാ വണ്ടി എന്നായി അടുത്തത്. അവനെ കണ്ടാല് അറിയില്ലേ പൊടി വലിയാണെന്നു തുടങ്ങിയ ഡയലോഗുകളും പിന്നാലെ തല്ലും, പുറകെ കേസുകള് കെട്ടിവയ്ക്കും. ഇതാണ് ഇയാളുടെ രീതി.
