തിരുവനന്തപുരം: തനിക്കെതിരെ സാമൂഹ്യമാധ്യമങ്ങളിലും ഫോണ്‍ കോളുകളിലും വരുന്ന ഭീഷണി സന്ദേശങ്ങള്‍ ഗൗരവതരമെന്ന് പ്രശസ്ത ഡബ്ബിംഗ് ആര്‍ട്ടിസ്റ്റ് ഭാഗ്യലക്ഷ്മി.നടന്‍ ദിലീപിന് ഈ ഭീഷണി സന്ദേശങ്ങളുമായി ബന്ധമില്ലെങ്കില്‍ ഫാന്‍സുകാരോട് ഈ ഭീഷണി നിര്‍ത്തൂ എന്ന് പരസ്യമായി പറയാന്‍ അയാള്‍ തയാറാകണമായിരുന്നു.
ഇത് തന്നെ കൂടുതല്‍ പ്രതിരോധത്തിലാക്കുന്നുവെന്ന് ദിലീപ് തന്നെ ആരാധകരോട് പറയുമായിരുന്നു. ഇത്തരം പ്രവര്‍ത്തികളെ ദിലീപ് തള്ളിപ്പറയാത്തിടത്തോളം ഇതില്‍ ദിലീപിന് പങ്കുണ്ടെന്ന് തോന്നിപ്പോകുന്നത് സ്വാഭാവികമാണെന്ന് ഭാഗ്യലക്ഷ്മി പ്രതികരിച്ചു.
‘കുറച്ച് തമാശയായിക്കൂടി പറയട്ടെ. എനിക്കിനി എന്തെങ്കിലും സംഭവിച്ചാല്‍ അതിന് ഉത്തരവാദി ദിലീപായിരിക്കും. കാരണം ക്വട്ടേഷന്‍ കൊടുക്കാന്‍ മിടുക്കനാണല്ലോ’ ഭാഗ്യലക്ഷ്മി പറഞ്ഞു. ദിലീപിന്റെ സിനിമയ്‌ക്കെതിരെ താന്‍ ഒന്നും പറഞ്ഞിട്ടില്ല. തന്റെ പേരില്‍ നിരവധി വ്യാജ പ്രചാരണങ്ങള്‍ നടക്കുന്നുണ്ടന്നും വേറെയൊരാള്‍ തനിക്ക് വേണ്ടി സംസാരിേെണ്ടതില്ലെന്നും തനിക്ക് പറയാനുള്ളത് താന്‍ പറഞ്ഞോളാമെന്നും ഭാഗ്യലക്ഷ്മി കൂട്ടിച്ചേര്‍ത്തു.
മുഖത്ത് ആസിഡ് ഒഴിക്കും എന്ന് ഭീഷണിപ്പെടുത്തി ഫോണ്‍ കോള്‍ വന്നതിന് ശേഷമായിരുന്നു ഭാഗ്യലക്ഷ്മിയുടെ പ്രതികരണം. വിദേശത്ത് നിന്നുള്‍പ്പെടെ കോളുകള്‍ വന്നു. കമന്റുകളില്‍ കൂടി ആരൊക്കെ തെറി വിളിച്ചാലും അതിനൊന്നും ഞങ്ങള്‍ ആരും മറുപടി പറയില്ല.ഞങ്ങള്‍ പോരാടുന്നത് നീതിക്ക് വേണ്ടിയാണ്, കൊട്ടേഷന്‍ കൊടുക്കാന്‍ അല്ല. തന്റെ മറുപടിയില്‍ കൂടി അങ്ങനെ വൈറല്‍ ആവണ്ട ഏട്ടന്റെ അനിയന്മാരെന്നും ഭാഗ്യലക്ഷ്മി പ്രതികരിച്ചു.
