കാന്‍ബെറ: വിശ്വാസത്തിന്റെ പേരില്‍ ആളുകള്‍ക്കെതിരായ അക്രമം മനുഷ്യ അന്തസിന് അപമാനമാണെന്ന് ദി ഓസ്‌ട്രേലിയന്‍ ജ്യൂയിഷ് ഹിന്ദു അലയന്‍സ് (താഝ). സിഡ്‌നിയിലെ ബോണ്ടി ബീച്ചിലുണ്ടായ ഭീകരാക്രമണത്തെ അപലപിച്ച് താഝ പുറത്തിറക്കിയ പ്രസ്താവനയിലാണ് ജൂത വംശജര്‍ക്കുള്ള ഐക്യദാര്‍ഢ്യം പ്രഖ്യാപിച്ചത്.
പവിത്രമായ മത പരിപാടി ആചരിക്കാന്‍ സമാധാനപരമായി ഒത്തുകൂടിയ കുട്ടികള്‍ ഉള്‍പ്പെടെയുള്ള നിരപരാധികളായ ജൂത കുടുംബങ്ങള്‍ക്ക് നേരെ അടുത്തിടെയുണ്ടായ അക്രമത്തിന് ഇരയായവര്‍ക്കൊപ്പം നിലകൊള്ളുന്നുവെന്ന് താഝ അറിയിച്ചു. വിശ്വാസം, സ്വത്വം, പൈതൃകം എന്നിവയുടെ പേരില്‍ ആളുകള്‍ക്കെതിരായ അക്രമവും ഭീഷണിയും മനുഷ്യ അന്തസിന് അപമാനമാണ്. ഓസ്ട്രേലിയയിലെന്നല്ല ലോകത്തിലെവിടെയും അവര്‍ക്ക് സ്ഥാനമില്ല എന്നും സംഘടന വ്യക്തമാക്കി. എല്ലാത്തരം യഹൂദവിരുദ്ധതയെയും, ഹിന്ദുഫോബിയയെയും, മതപ്രേരിതമായ വിദ്വേഷത്തെയും ശക്തമായി അപലപിക്കുന്നതായി പ്രസ്താവനയില്‍ പറയുന്നു.
അതോടൊപ്പം മതപരമായ വിദ്വേഷത്തോട് വിട്ടുവീഴ്ചയില്ലാത്ത സമീപനം സ്വീകരിക്കണമെന്നും ദി ഓസ്‌ട്രേലിയന്‍ ജ്യൂയിഷ് ഹിന്ദു അലയന്‍സ് പ്രസ്താവനയില്‍ ആവശ്യപ്പെട്ടു.
