കണ്ണൂര്‍: സിപിഎമ്മിന്റെ ദളിത് വേട്ടക്കെതിരെ ഒറ്റയാള്‍ പോരാട്ടം നടത്തിയ പയ്യന്നൂര്‍ എടാട്ടെ ചിത്രലേഖയെ അഭ്രപാളിയിലെത്തിക്കാന്‍ മലയാളത്തിലെ ലേഡി സൂപ്പര്‍ സ്റ്റാര്‍ മഞ്ജുവാര്യരുമായി സംസാരിക്കുമെന്ന് ഇംഗ്ലീഷ് തിരക്കഥാകൃത്ത് ഫ്രേയ്‌സര്‍ സ്‌കോട്ട്. തിരുവനന്തപുരത്ത് അന്താരാഷ്‌ട്ര ചലച്ചിത്രമേളയിലെത്തിയ ഫ്രേയ്‌സര്‍ സ്‌കോട്ട് മഞ്ജുവാര്യരോട് ചിത്രലേഖയുടെ കഥപറയാനുള്ള നീക്കത്തിലാണ്.
ഫൂലന്‍ദേവിയുടെ കഥ പറഞ്ഞ ബാന്‍ഡിറ്റ് ക്വീന്‍ ഉള്‍പ്പെടെ സംവിധാനം ചെയ്ത ശേഖര്‍ കപൂറാണ് ചിത്രലേഖയെക്കുറിച്ചുള്ള സിനിമ സംവിധാനം ചെയ്യുന്നത്. തിരക്കഥ പൂര്‍ത്തിയാക്കിയ ഫ്രേയ്‌സര്‍ സ്‌കോട്ടും ശേഖര്‍ കപൂറും നേരത്തെ തന്നെ സിനിമയെ കുറിച്ച് സംസാരിച്ചിരുന്നു.
2024 ഒക്‌ടോബര്‍ അഞ്ചിനാണ് ചിത്രലേഖ കാന്‍സര്‍ ബാധിതയായി മരിച്ചത്. 2018 ലും 2020 ലും കണ്ണൂരിലെത്തി ചിത്രലേഖയുമായി സംസാരിച്ചാണ് ഫ്രേയ്‌സര്‍ സ്‌കോട്ട് തിരക്കഥ തയ്യാറാക്കിയത്. ചിത്രലേഖയുമായി സംസാരിച്ച സമയത്ത് മഞ്ജുവാര്യര്‍ തന്റെ കഥാപാത്രത്തെ അവതരിപ്പിക്കണമെന്ന ആഗ്രഹം പ്രകടിപ്പിച്ചതായി ഫ്രേയ്‌സര്‍ സ്‌കോട്ട് വെളിപ്പെടുത്തി.
ഇതിന്റെ അടിസ്ഥാനത്തിലാണ് മഞ്ജുവാര്യരുമായി സംസാരിക്കാനുള്ള നീക്കം നടത്തുന്നത്. കേവലം ജാതിവിവേചനത്തിനപ്പുറം ലിംഗവിവേചനത്തിന്റ ഇരകൂടിയാണ് ചിത്രലേഖ.
ഗൂഗിളില്‍ സെര്‍ച്ച് ചെയ്യുന്നതിനിടെയാണ് ചിത്രലേഖയയുടെ പോരാട്ടം ഫ്രേയ്‌സര്‍ സ്‌കോട്ടിന്റെ ശ്രദ്ധയില്‍പ്പെട്ടത്. ശേഖര്‍ കപൂറിന്റെ ശ്രദ്ധയില്‍പ്പെടുത്തിയപ്പോള്‍ ചിത്രലേഖയുടെ ജീവിതം ബന്‍ഡിറ്റ് ക്വീനിനെ പോലെതന്നെ ധൈര്യമുള്ളതാണെന്നായിരുന്നു പ്രതികരണം.
ശേഖര്‍ കപൂര്‍ നല്‍കിയ ആത്മവിശ്വാസമാണ് കണ്ണൂരിലെത്തി ചിത്രലേഖയെ കാണാനും തിരക്കഥ തയാറാക്കാനും സ്‌കോട്ടിന് പ്രേരണയായത്. 20 ദിവസത്തോളമെടുത്താണ് അദ്ദേഹം തിരക്കഥ പൂര്‍ത്തിയാക്കിയത്. ഹിന്ദി ഭാഷയില്‍ ചെയ്യുന്ന സിനിമ ലോകശ്രദ്ധയിലെത്തിക്കുകയാണ് അദ്ദേഹത്തിന്റെ ലക്ഷ്യം. ശേഖര്‍ കപൂറിനെ പോലുള്ള മുന്‍നിര സംവിധായകന്റെ സിനിമയില്‍ മഞ്ജുവാര്യര്‍ അഭിനയിക്കാന്‍ തയ്യാറാകുമെന്ന പ്രതിക്ഷയിലാണ് ഫ്രേയ്‌സര്‍ സ്‌കോട്ട്.
ജന്മഭൂമി ഓണ്‍ലൈന്‍