ന്യൂദല്ഹി: സാമ്പത്തിക വളര്ച്ചയ്ക്കൊപ്പം ഭാരതം മറ്റു രംഗങ്ങളിലും ശക്തമായ കുതിപ്പില്. നിര്മിത ബുദ്ധിയെന്ന എഐ (ആര്ട്ടിഫിഷ്യല് ഇന്റലിജന്സ്) രംഗത്ത് ഭാരതം മൂന്നാം സ്ഥാനത്തെത്തി. 2023ല് ഏഴാമതായിരുന്ന ഭാരതം വെറും ഒരു കൊല്ലം കൊണ്ടാണ് എഐ വളര്ച്ചയില് മൂന്നാം സ്ഥാനത്തെത്തിയതെന്ന് സ്റ്റാന്ഫോര്ഡ് സര്വകലാശാലയുടെ 2024ലെ എഐ വൈബ്രന്സി സൂചകത്തില് പറയുന്നു. അമേരിക്കയും ചൈനയുമാണ് ഒന്നും രണ്ടും സ്ഥാനങ്ങളില്. ദക്ഷിണ കൊറിയയും ബ്രിട്ടനുമാണ് നാല്, അഞ്ച് സ്ഥാനങ്ങളില്. ഏഴു ഘടകങ്ങളെ അടിസ്ഥാനമാക്കിയാണ് റാങ്കിങ് നിശ്ചയിച്ചത്.
എഐയിലെ ഗവേഷണം വികസനം, ഉത്തരവാദിത്ത ബോധമുള്ള എഐ, സമ്പദ് വ്യവസ്ഥ, പ്രതിഭാനയം, ഭരണം, ജനാഭിപ്രായം, അടിസ്ഥാന സൗകര്യം എന്നിവയില് 67 രാജ്യങ്ങളിലെ ഘടകങ്ങളാണ് പരിശോധിച്ചത്. ഏഴാം സ്ഥാനത്തു നിന്ന് മൂന്നാം സ്ഥാനത്തെത്തിയ ഭാരതം എടുത്തു പറയേണ്ട നേട്ടമാണ് കൈവരിച്ചതെന്നും ഭാരതത്തിനുള്ളത് 21.59 പോ
യിന്റാണെന്നും റിപ്പോര്ട്ടിലുണ്ട്. സാമ്പത്തികക്ഷമതയിലും ഭാരതം ശക്തമാണ്.
ഒന്നാമതുള്ള യുഎസിന് 78.6 പോയിന്റും രണ്ടാമതുള്ള ചൈനയ്ക്ക് 36.95 പോയിന്റുമാണ്. നാലാമതുള്ള ദക്ഷിണ കൊറിയയ്ക്ക് 17.24 പോയിന്റുണ്ട്. അഞ്ചാമതുള്ള ബ്രിട്ടന് 16.64 പോയിന്റാണ്. സര്ക്കാര് നയങ്ങള്, അതിശക്തമായ മനുഷ്യ വിഭവ ശേഷി, എഐ സ്റ്റാര്ട്ടപ്പുകള്, എഐ ഗവേഷണങ്ങള്, എഐ അടിസ്ഥാന സൗകര്യ വികസനം, ഡിജിറ്റല് ഇന്ത്യ, ഇന്ത്യ എഐ മിഷന് എന്നിവയാണ് ഭാരതത്തിന് കുതിപ്പ് പകരുന്നത്. സിങ്കപ്പൂര്, ജപ്പാന്, കാനഡ, ജര്മനി, ഫ്രാന്സ് തുടങ്ങിയ രാജ്യങ്ങളെല്ലാം ഭാരതത്തിനു പിന്നിലാണ്.
