ശിവഗിരി: തീര്ത്ഥാടനങ്ങളെല്ലാം ആത്മീയ ലക്ഷ്യം കൈവരിക്കുന്ന വിധത്തിലേക്ക് ജനതയെ നയിക്കുമ്പോള് ശിവഗിരി തീര്ത്ഥാടനം ആത്മീയതയിലും ഭൗതികതയിലും മനുഷ്യന്റെ പുരോഗതിയാണ് ലക്ഷ്യമാക്കുന്നതെന്നു ശ്രീനാരായണ ധര്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ പറഞ്ഞു.
93-ാമതു ശിവഗിരി തീര്ത്ഥാടനകാല സമ്മേളനത്തില് അധ്യക്ഷ പ്രസംഗം നടത്തുകയായിരുന്നു സ്വാമി. ജ്ഞാനികള് ലോകസേവയില് മുഴുകുകയാണ് വേണ്ടതെന്നു ഗുരുദേവന് സ്വധര്മത്തിലൂടെ കാട്ടിത്തന്നു. ജാതി, മത, രാഷ്ട്രീയ താത്പര്യങ്ങള് ജ്ഞാനികളെ സംബന്ധിച്ച് ഏകമാണെന്ന് കരുതണം.
മാനവരൊക്കെയും ഒന്ന്, അതാണ് നമ്മുടെ മതം എന്നായിരുന്നു ഗുരുദേവന് പഠിപ്പിച്ചത്. മനുഷ്യര് തമ്മില് സാഹോദര്യം പുലര്ത്തണം അതിലൂടെ കലഹങ്ങളൊക്കയും ഇല്ലാതാകണം. ശിവഗിരി തീര്ത്ഥാടനം ഏതെങ്കിലും ഒരു വിഭാഗത്തിന്റെ പുരോഗതിയല്ല ലക്ഷ്യംവയ്ക്കുന്നത്. വ്യക്തിയുടെയും സമൂഹത്തിന്റെയും രാജ്യത്തിന്റെയും സമഗ്ര പുരോഗതി ശിവഗിരി തീര്ത്ഥാടനത്തിലൂടെ കൈവരണം. ഇതാണ് തീര്ത്ഥാടന ലക്ഷ്യങ്ങളിലൂടെ ഗുരു പകര്ന്നു നല്കിയതെന്ന് സച്ചിദാനന്ദ സ്വാമി ചൂണ്ടിക്കാട്ടി.
വര്ക്കല എംഎല്എ വി. ജോയ് ഉദ്ഘാടനം ചെയ്തു. ധര്മസംഘം ട്രസ്റ്റ് ജനറല് സെക്രട്ടറി സ്വാമി ശുഭാംഗാനന്ദ, ട്രഷററും തീര്ത്ഥാടന കമ്മിറ്റി സെക്രട്ടറിയുമായ സ്വാമി ശാരദാനന്ദ, ശ്രീനാരായണ സാംസ്കാരിക സമിതി സംസ്ഥാന പ്രസിഡന്റ് രതീഷ് ജെ. ബാബു, സ്മിത സുന്ദരേശന് ഗുരുധര്മ പ്രചരണ സഭ സെക്രട്ടറി സ്വാമി അനംഗാനന്ദഗിരി, സ്വാമി വിശാലാനന്ദ തുടങ്ങിയവര് സംസാരിച്ചു.
