ശിവഗിരി: 93-ാമത് ശിവഗിരി തീര്ത്ഥാടനത്തോടനുബന്ധിച്ച് രണ്ടാം ദിവസമായ ഇന്നലെ, ഗുരുദേവന് നടന്ന വീഥികളിലൂടെയുള്ള തീര്ത്ഥാടന ഘോഷയാത്രയില് പീതാംബരധാരികളായ ആയിരങ്ങള് അണിനിരന്നു. രാവിലെ 5.30ന് മഹാസമാധി പീഠത്തില് സ്വാമി നിത്യ സ്വരൂപാനന്ദയുടെ നേതൃത്വത്തില് നടന്ന വിശേഷാല് ഗുരുപൂജയ്ക്ക് ശേഷം ഘോഷയാത്ര ആരംഭിച്ചു. ഗുരുദേവ നാമങ്ങള് ഉരുവിട്ട് ഗുരുദേവ റിക്ഷയ്ക്ക് ഒപ്പം നീങ്ങിയ തീര്ത്ഥാടകര് വര്ക്കല മൈതാനം വഴി റെയില്വേ സ്റ്റേഷന് ശ്രീകൃഷ്ണസ്വാമി ക്ഷേത്രം ചുറ്റി തിരികെ 8.30 ന് മഹാസമാധിയില് എത്തി. ശ്രീനാരായണ ധര്മ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ തീര്ത്ഥാടന സന്ദേശം നല്കി.
തുടര്ന്ന് ചേര്ന്ന സമ്മേളനം മുഖ്യമന്ത്രി പിണറായി വിജയന് ഉദ്ഘാടനം ചെയ്തു. ലോകം നേരിടുന്ന ഏതു സംഘര്ഷത്തിനും ദുരന്തത്തിനും പരിഹാരം കാണാന് കഴിയുന്ന സര്വ്വ രോഗനിവാരിണിയാണ് ഗുരുവിന്റെ മനുഷ്യ സങ്കല്പം എന്ന് മുഖ്യമന്ത്രി പറഞ്ഞു. സ്വാമി സച്ചിദാനന്ദ അധ്യക്ഷനായി. കര്ണാടക മുഖ്യമന്ത്രി സിദ്ധരാമയ്യ വിശിഷ്ടാതിഥിയായി. മന്ത്രി വി.എന്. വാസവന്, എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്, ബിജെപി സംസ്ഥാന ജനറല് സെക്രട്ടറി ശോഭാ സുരേന്ദ്രന്, എഐസിസി ജനറല് സെക്രട്ടറി കെ.സി.വേണുഗോപാല്, അടൂര് പ്രകാശ് എംപി, ഗോകുലം ഗ്രൂപ്പ് ചെയര്മാന് ഗോകുലം ഗോപാലന്, വി. ജോയ് എംഎല്എ തുടങ്ങിയവര് സംസാരിച്ചു.
