ന്യൂദല്ഹി: വ്യാജ ഡിജിറ്റല് അറസ്റ്റ്, വ്യാജ വായ്പാ തട്ടിപ്പുകള്, നിക്ഷേപ അവസരങ്ങള് എന്നിവയുള്പ്പെടെ വിവിധ സൈബര് തട്ടിപ്പ് പ്രവര്ത്തനങ്ങളിലേക്ക് ആളുകളെ കബളിപ്പിക്കുന്ന തരത്തില് രാജ്യത്തുടനീളം ഫിഷിങ് സന്ദേശങ്ങള് അയച്ചിരുന്ന പ്രധാന ശൃംഖലയിലെ മൂന്നു പേരെ സിബിഐ അറസ്റ്റ് ചെയ്തു. സോന്വീര് സിംങ്, ഹിമാലയ, മനീഷ് ഉപേതി എന്നിവരാണ് അറസ്റ്റിലായവര്.
സൈബര് കുറ്റകൃത്യങ്ങള്ക്കെതിരെ നടക്കുന്ന ഓപ്പറേഷന് ചക്ര-വി പ്രകാരം, ആളുകള്ക്ക് ദിവസേന ലഭിക്കുന്ന ധാരാളം വ്യാജ എസ്എംഎസുകള് സിബിഐ പരിശോധിക്കുകയും ഇത് പലപ്പോഴും ഗുരുതരമായ സാമ്പത്തിക തട്ടിപ്പിലേക്ക് നയിക്കുന്നതായി കണ്ടെത്തുകയും ഇതുപ്രകാരം അന്വേഷണത്തിനിടെ, ദേശീയ തലസ്ഥാന മേഖല, ചണ്ഡീഗഡിലെ വിവിധ പ്രദേശങ്ങളില് പ്രവര്ത്തിക്കുന്ന ഒരു സംഘടിത സൈബര് സംഘമാണിതെന്ന് തിരിച്ചറിയുകയും ചെയ്തു. തുടര്ന്ന് ദല്ഹി, നോയിഡ, ചണ്ഡീഗഡ് എന്നിവിടങ്ങളിലെ നിരവധി സ്ഥലങ്ങളില് നടത്തിയ തെരച്ചിലില് ഫിഷിങ് സന്ദേശങ്ങള് അയയ്ക്കുന്നതിന് ഉപയോഗിക്കുന്ന സെര്വറുകള്, ആശയവിനിമയ ഉപകരണങ്ങള്, യുഎസ്ബി ഹബ്ബുകള്, ഡോംഗിളുകള്, ടെലികമ്മ്യൂണിക്കേഷന് വകുപ്പിന്റെ (ഡിഒടി) നിയമങ്ങള് ലംഘിച്ച് വ്യാജമായി നേടിയ 21,000 ഓളം സിം കാര്ഡുകള് എന്നിവയും മറ്റ് പ്രധാനപ്പെട്ട ഡിജിറ്റല് തെളിവുകള്, കണക്കില്പ്പെടാത്ത പണം, ക്രിപ്റ്റോകറന്സിയടക്കംം പിടിച്ചെടുത്തു.
ടെലികോം കമ്പനികളുടെ ചില ചാനല് പങ്കാളികളും അവരുടെ ജീവനക്കാരും ഈ തട്ടിപ്പിന് നിയമവിരുദ്ധമായി സിം കാര്ഡുകള് ക്രമീകരിക്കാന് സഹായിച്ചതായും പ്രാഥമിക കണ്ടെത്തലുകള് സൂചിപ്പിക്കുന്നു.
