കണ്ണൂര്‍: തദ്ദേശ തെരഞ്ഞെടുപ്പിലെ തിരിച്ചടിക്ക് പിന്നാലെ സംസ്ഥാന സര്‍ക്കാരിനും കമ്മ്യൂണിസ്റ്റ് പാര്‍ട്ടി നേതൃത്വത്തിനുമെതിരെ കടുത്ത വിമര്‍ശനവുമായി സിപിഐ നേതാവ് പന്ന്യന്‍ രവീന്ദ്രന്റെ മകന്‍ രൂപേഷ് രംഗത്തെത്തി. തെരഞ്ഞെടുപ്പ് കാലത്ത് മാത്രം വിതറി എറിയുന്ന ധാന്യമണികളിലോ പണക്കിഴികളിലോ കുരുങ്ങിക്കിടക്കുന്നവരല്ല സാധാരണക്കാരെന്ന് ഫേസ്ബുക്ക് കുറിപ്പില്‍ രൂപേഷ് വ്യക്തമാക്കി.
ആകാശഗോപുരങ്ങളില്‍ അന്തിയുറങ്ങി അധികാരത്തിന്റെ ബീക്കണ്‍ ലൈറ്റിട്ട് അകമ്പടിക്കാരെ കൂട്ടി കുതിച്ചു പായുന്ന മഹാരാജാക്കന്മാര്‍ വാഴുന്ന രാജസദസായി മാറുമ്പോള്‍ ഉയരുന്ന തേങ്ങലുകള്‍ തിരിച്ചറിഞ്ഞില്ലെങ്കില്‍ കാലം ഇനിയും കാത്തിരിക്കില്ലെന്ന് രൂപേഷ് വിമര്‍ശിച്ചു.
അതിദാരിദ്ര്യ നിര്‍മാര്‍ജനം മറയ്‌ക്കാനുള്ള ആഘോഷത്തിനായി പൊടിച്ച കോടികള്‍ കൊണ്ട് വീടില്ലാത്ത കുറച്ച് പേര്‍ക്ക് വീട് വെച്ച് കൊടുത്തെങ്കില്‍ എന്ന് ഒരുവേള ചിന്തിക്കാത്ത ഒറ്റ മനുഷ്യരും കാണില്ല ഈ കൊച്ചു കേരളത്തിലെന്നും അദ്ദേഹം എഴുതി.
ചുവപ്പുകൊടി പിടിച്ചതുകൊണ്ടോ ചുവന്ന വസ്ത്രം ധരിച്ചത് കൊണ്ടോ കയ്യൂരും കരിവള്ളൂരും പുന്നപ്രയും വയലാറും കണ്ഠനാളങ്ങളില്‍ ഏറ്റുവിളിച്ചതുകൊണ്ടോ ആരും കമ്മ്യൂണിസ്റ്റാകില്ലെന്ന് രൂപേഷ് വ്യക്തമാക്കി. ഭരണത്തിലേറാനായി കമ്മ്യൂണിസ്റ്റാകുന്നവരല്ല യഥാര്‍ത്ഥ കമ്മ്യൂണിസ്റ്റുകാര്‍. യഥാര്‍ത്ഥ കമ്മ്യൂണിസ്റ്റുകളെ ആര്‍ക്കും വേണ്ട എന്ന തിരിച്ചറിവുണ്ടെങ്കിലും, യഥാര്‍ത്ഥ കമ്മ്യൂണിസ്റ്റ് പാര്‍ട്ടിയായി മാറാനുള്ള ഒരു ടേണിംഗ് പോയിന്റ് ആകട്ടെ ഈ തോല്‍വി എന്ന് വെറുതെ മോഹിച്ചുപോകുന്നുവെന്നും അദ്ദേഹം കുറിപ്പില്‍ പറയുന്നു.
വിലക്കയറ്റം നിയന്ത്രിക്കാന്‍ കഴിയാതെ സാധാരണക്കാര്‍ നെട്ടോട്ടമോടുമ്പോള്‍ ഇസ്രയേലും പാലസ്തീനും ട്രംപും പുട്ടിനും ജാതിയും മതവും തുടങ്ങി ലോകത്തെ സകലമാന വിഷയങ്ങളും ചര്‍ച്ച ചെയ്താല്‍ പ്രമാണിമാരുടെയും പ്രമുഖരുടെയും സംസ്‌കാരിക നായകരുടെയും മനസ് നിറയുമെങ്കിലും സാധാരണക്കാരുടെ വയറ് നിറയില്ലെന്ന സത്യം ഇനിയെങ്കിലും തിരിച്ചറിയണമെന്ന് രൂപേഷ് ആവശ്യപ്പെട്ടു.
