ശ്രീനഗര്‍: പഹല്‍ഗാം ഭീകരാക്രമണത്തിനു പിന്നില്‍ പാക് ഭീകര സംഘടനയായ ലഷ്‌കര്‍ ഇ തോയ്ബയും ദി റസിസ്റ്റന്‍സ് ഫ്രണ്ടുമെന്ന് (ടിആര്‍എഫ്) എന്‍ഐഎ. എല്‍ഇടി കമാന്‍ഡറായ സാജിദ് ജാട്ടാണ് ഭീകരാക്രമണത്തിന്റെ മുഖ്യ സൂത്രധാരനെന്നും കുറ്റപത്രത്തില്‍ പറയുന്നു. പാക് പിന്തുണയില്‍ വര്‍ഗീയ ലക്ഷ്യത്തോടെയാണ് ഭീകരാക്രമണം നടത്തിയത്. 1,597 പേജുള്ള കുറ്റപത്രം എന്‍ഐഎ സംഘം ഇന്നലെ ജമ്മുവിലെ പ്രത്യേക കോടതിയില്‍ സമര്‍പ്പിച്ചു.
കുറ്റപത്രത്തില്‍ പാകിസ്ഥാന്റെ ഗൂഢാലോചന, പ്രതികളുടെ പങ്ക്, കേസില്‍ പിന്തുണയ്‌ക്കുന്ന തെളിവുകള്‍ എന്നിവ വിശദമായി പ്രതിപാദിക്കുന്നുണ്ട്. ഭീകരാക്രമണം ആസൂത്രണം ചെയ്ത് നടപ്പിലാക്കുന്നതില്‍ ലഷ്‌കറും ടിആര്‍എഫും നേരിട്ട് ഇടപെടലുകള്‍ നടത്തിയിട്ടുണ്ട്. സാജിദിനെ കൂടാതെ ജൂലൈയില്‍ ശ്രീനഗര്‍ ഡാച്ചിഗാമില്‍ നടന്ന ഓപ്പറേഷന്‍ മഹാദേവില്‍ കൊല്ലപ്പെട്ട പാക് ഭീകരരായ സുലൈമാന്‍ ഷാ, ഹബീബ് താഹിര്‍ അഥവാ ജിബ്രാന്‍, ഹംസ അഫ്ഗാനി എന്നിവരുടെ പേരും കുറ്റപത്രത്തിലുണ്ട്.
ഭാരതീയ ന്യായ സംഹിത (ബിഎന്‍എസ്), ആയുധ നിയമം (2023), നിയമ വിരുദ്ധ പ്രവര്‍ത്തനങ്ങള്‍ (തടയല്‍) നിയമം(1959), (1967) എന്നിവ പ്രകാരമാണ് എല്‍ഇടിക്കും ടിആര്‍എഫിനും നാല് പ്രതികള്‍ക്കുമെതിരേ കുറ്റം ചുമത്തിയിരിക്കുന്നത്. ഭാരതത്തിനെതിരേ യുദ്ധം ചെയ്തതിനും കുറ്റം ചുമത്തിയിട്ടുണ്ട്. കൂടാതെ ഭീകരര്‍ക്ക് അഭയം നല്കിയതിന് അറസ്റ്റിലായ പര്‍വേസ് അഹമ്മദ്, ബഷീര്‍ അഹമ്മദ് എന്നീ രണ്ട് പേര്‍ക്കെതിരേയും കുറ്റപത്രം സമര്‍പ്പിച്ചിട്ടുണ്ട്. ഇവര്‍ ലഷ്‌കര്‍ ഇ തൊയ്ബയുമായി ബന്ധമുള്ള പാക് പൗരന്മാരാണെന്നും എന്‍ഐഎ സ്ഥിരീകരിച്ചിട്ടുണ്ട്. 350 പ്രദേശവാസികളടക്കം രണ്ടായിരത്തോളം പേരെ കേസ് അന്വേഷണത്തിന്റെ ഭാഗമായി എന്‍ഐഎ ചോദ്യം ചെയ്തിരുന്നു. ഇവരുടെ മൊഴികളും തെളിവുകളോടൊപ്പം കുറ്റപത്രത്തില്‍ ഉള്‍പ്പെടുത്തിയിട്ടുണ്ട്.
