കൊച്ചി: വിജയിച്ച സ്ഥാനാര്‍ത്ഥി എതിര്‍ സ്ഥാനാര്‍ത്ഥിയുടെ ചിഹ്നമായ ടിവിയില്‍ കാല്‍ വച്ച് കഴുകിയത് സംഘര്‍ഷത്തിന് കാരണമായി.കളമശേരി നഗരസഭാ തിരഞ്ഞെടുപ്പില്‍ വിജയിച്ച മുസ്ലിം ലീഗ് സ്ഥാനാര്‍ഥിയാണ് തനിക്കെതിരെ റിബല്‍ സ്ഥാനാര്‍ഥിയായി മത്സരിച്ചയാളുടെ തിരഞ്ഞെടുപ്പ് ചിഹ്നമായ ടിവിയില്‍ കാല്‍വെച്ച് കഴുകിയ ശേഷം അത് തകര്‍ത്തത്.
ഇതോടെ സ്ഥലത്ത് കോണ്‍ഗ്രസ് – മുസ്ലീംലീഗ് പ്രവര്‍ത്തകര്‍ തമ്മില്‍ തുടങ്ങിയ വാക്ക് തര്‍ക്കം കൈയാങ്കളിയിലെത്തി.മുതിര്‍ന്ന നേതാക്കള്‍ ഇടപെട്ട് സ്ഥിതി വഷളാകാതെ നിയന്ത്രിച്ചു.യു.ഡി.എഫ് വിജയത്തെ തുടര്‍ന്ന് നടത്തിയ ആഹ്ലാദ പ്രകടനത്തിനിടെയാണ് നഗരസഭാ ഓഫീസിന് മുന്നില്‍ സംഭവം ഉണ്ടായത്.വിജയാഘോഷത്തിനിടെ പ്രവര്‍ത്തകര്‍ കൊണ്ടുവന്ന ടിവിയില്‍ റിയാസ് കാല്‍ വെച്ച് കുപ്പി വെള്ളം ഉപയോഗിച്ച് രണ്ട് കാലുകളും കഴുകി. തുടര്‍ന്ന് പ്രവര്‍ത്തകര്‍ ടിവി തകര്‍ത്തു.
ഇതിനെ ചോദ്യം ചെയ്ത കോണ്‍ഗ്രസ് പ്രവര്‍ത്തകരും ലീഗ് പ്രവര്‍ത്തകരും തമ്മില്‍ കൈയാങ്കളിയായി. നഗരസഭയിലെ 43-ാം വാര്‍ഡായ കെ ബി പാര്‍ക്കില്‍ മുസ്ലിം ലീഗ് സ്ഥാനാര്‍ഥി കെഎ റിയാസാണ് വിജയിച്ചത്.
മുമ്പ് സംവരണ വാര്‍ഡായിരുന്ന ഇവിടെ കൗണ്‍സിലറായിരുന്ന കെവി പ്രശാന്ത്, നിലവിലെ അംഗമെന്ന നിലയില്‍ കെബി പാര്‍ക്ക് വാര്‍ഡില്‍ മത്സരിക്കാന്‍ അവസരം ചോദിച്ചെങ്കിലും, റിയാസിനെ സ്ഥാനാര്‍ഥിയാക്കാന്‍ മുസ്ലിം ലീഗ് തീരുമാനിച്ചു. ഇതോടെ പ്രശാന്ത് റിബല്‍ സ്ഥാനാര്‍ഥിയായി മത്സരിക്കുകയായിരുന്നു. ഒരു വിഭാഗം കോണ്‍ഗ്രസ് പ്രവര്‍ത്തകര്‍ പ്രശാന്തിനെ പിന്തുണച്ചു.റിയാസ് 523 വോട്ടുകള്‍ നേടി വിജയിച്ചു. രണ്ടാം സ്ഥാനത്തെത്തിയ പ്രശാന്തിന് 264 വോട്ടുകളും മൂന്നാം സ്ഥാനത്തായ സിപിഎം സ്ഥാനാര്‍ഥിക്ക് 262 വോട്ടുകളുമാണ് കിട്ടിയത്.
