കോഴിക്കോട്: ബിജെപിയുടെ യുവസ്ഥാനാര്‍ത്ഥികള്‍ സിപിഎം കോട്ടകളില്‍ വിജയക്കൊടി നാട്ടി. അഞ്ച് പതിറ്റാണ്ടായി സിപിഎം കുത്തകയാക്കി വെച്ചിരുന്ന കോഴിക്കോട് കോര്‍പറേഷനിലെ പൊറ്റമ്മല്‍ വാര്‍ഡില്‍ ബിജെപി സ്ഥാനാര്‍ത്ഥി ടി. റെനീഷിന് തകര്‍പ്പന്‍ വിജയം.
സിപിഎമ്മിന്റെ മേയര്‍ സ്ഥാനാര്‍ത്ഥികള്‍ക്ക് എളുപ്പം വിജയിക്കാന്‍ തെരഞ്ഞെടുത്തിരുന്ന വാര്‍ഡാണ് പൊറ്റമ്മല്‍. ചന്ദ്രശേഖരകുറുപ്പ്, പ്രൊഫ. സേതുമാധവന്‍, പ്രൊഫ. എ.കെ. പ്രേമജം, ഡോ. ബീനാ ഫിലിപ്പ് തുടങ്ങിയ പ്രമുഖര്‍ ജയിച്ച മണ്ഡലത്തിലാണ് ടി. റെനീഷ് 168 വോട്ടിന്റെ ഭൂരിപക്ഷത്തില്‍ തകര്‍പ്പന്‍ വിജയം നേടിയത്. തിരുത്തിയാട് വാര്‍ഡില്‍ സിപിഎം നേതാവ് ടി.പി. ദാസന്റെ മകള്‍ മിലി ഡി. എലിനെ ബിജെപിയുടെ ജിഷ ശബരീഷ് 121 വോട്ടിന് പരാജയപ്പെടുത്തി. ബേപ്പൂര്‍, സിവില്‍, കുതിരവട്ടം വാര്‍ഡുകളിലും ബിജെപിയുടെ മുന്നേറ്റത്തില്‍ സിപിഎം തകര്‍ന്നു. ചാലപ്പുറം, പാറോപ്പടി, എന്നീ കോണ്‍ഗ്രസ് കുത്തകവാര്‍ഡുകളിലും ബിജെപി വിജയിച്ചു. ചാലപ്പുറത്ത് ചതുഷ്‌കോണ മത്സരത്തിലാണ് ബിജെപി സ്ഥാനാര്‍ത്ഥി അനില്‍കുമാര്‍ കെ.പി. വിജയിച്ചത്. പാറോപ്പടിയില്‍ കെപിസിസി ജനറല്‍ സെക്രട്ടറി അഡ്വ. പി.എം. നിയാസിനെ പരാജയപ്പെടുത്തിയാണ് ബിജെപി ജില്ലാ കമ്മിറ്റി അംഗമായ ഹരീഷ് പൊറ്റങ്ങാടി 260 വോട്ട് ഭൂരിപക്ഷത്തില്‍ വിജയിച്ചത്.
