തിരുവനന്തപുരം: രണ്ട് ഘട്ടങ്ങളിലായി നടന്ന തദ്ദേശ തെരഞ്ഞെടുപ്പ് പൂര്ത്തിയായി. രണ്ടാംഘട്ടത്തില് പോളിങ് ശതമാനം ഉയര്ന്നു. 75 ശതമാനം കടന്നതായി ഒടുവില് ലഭിക്കുന്ന വിവരം (രാത്രി 10 മണിക്കുള്ള കണക്കനുസരിച്ച് 76.09%). ഒന്നാം ഘട്ടത്തില് 70.91 ശതമാനമായിരുന്നു പോളിങ്.
ഏറ്റവും കൂടുതല് പോളിങ് വയനാട് ജില്ലയില്, 78.3%. കുറവ് പത്തനംതിട്ടയിലും, 66.78%. ഇന്നലെ തെരഞ്ഞെടുപ്പ് നടന്ന ജില്ലകളിലെ പോളിങ് ശതമാനം കാസര്കോട് 74.86%, കണ്ണൂര് 76.77%, വയനാട് 78.3%, കോഴിക്കോട് 77.26%, മലപ്പുറം 77.43%, പാലക്കാട് 76.27%, തൃശൂര് 72.27%. കോര്പറേഷനുകളില് കൂടുതല് പോളിങ് കോഴിക്കോട് നഗരസഭയില്, 69.55%, കുറവ് തിരുവനന്തപുരത്തും 58.29%.
കണ്ണൂരില് പലയിടത്തും എന്ഡിഎ പ്രവര്ത്തകര്ക്ക് നേരെ സിപിഎം അക്രമം. വിവിധ ഭാഗങ്ങളിലെ പല ബൂത്തുകളിലും സിപിഎമ്മുകാര് വ്യാപകമായി കള്ളവോട്ട് ചെയ്തു. സ്ഥാനാര്ത്ഥിയെ ആക്രമിച്ചു പരിക്കേല്പ്പിച്ചു. കൂത്തുപറമ്പ് മുനിസിപ്പാലിറ്റി നരവൂര് സെന്റര് വാര്ഡില് ബൂത്തിനുള്ളില് കള്ളവോട്ട് തടഞ്ഞ ബിഡിജെഎസ് കൂത്തുപറമ്പ് മണ്ഡലം പ്രസിഡന്റും കൂത്തുപറമ്പ് നരവൂര് 16-ാം വാര്ഡ് സ്ഥാനാര്ത്ഥിയുമായ കെ. വിനേഷ് ബാബുവിനെയാണ് ആക്രമിച്ചത്. വിനേഷ് ബാബുവിനെ കൂത്തുപറമ്പ് താലൂക്ക് ആശുപത്രിയില് പ്രവേശിപ്പിച്ചു.
പടിയൂര് പഞ്ചായത്തിലെ കുയിലൂര് വാര്ഡിലെ കുയിലൂര് എല്പി സ്കൂള് ബൂത്തിന് സമീപം വെച്ച് ബിജെപി പ്രവര്ത്തകനായ ധനേഷിനെ സിപിഎമ്മുകാര് കൂട്ടം ചേര്ന്ന് മര്ദിച്ചു. പരിക്കേറ്റ ധനേഷ് ഇരിട്ടി താലൂക്ക് ആശുപത്രിയില് ചികിത്സ തേടി.
