ന്യൂദല്‍ഹി: പ്രശസ്ത അവതാരകനും നടനുമായ കപില്‍ ശര്‍മ്മയുടെ കാനഡയിലെ ഭക്ഷണശാലയ്‌ക്ക് നേരെയുണ്ടായ വെടിവെപ്പിന് പിന്നിലെ മൂന്ന് പ്രതികളെ പോലീസ് തിരിച്ചറിഞ്ഞു. ഷാരി, ദല്ജോത് റെഹാല്‍, സീപു എന്നിവരാണ് പ്രതികള്‍. ഇവര്‍ക്ക് ലോറന്‍സ് ബിഷ്‌ണോയി സംഘവുമായി അടുത്ത ബന്ധമുണ്ടെന്ന് ദല്‍ഹി പോലീസ് കണ്ടെത്തി.
സംഭവവുമായി ബന്ധപ്പെട്ട് ദല്‍ഹി പോലീസ് കഴിഞ്ഞ മാസം അറസ്റ്റ് ചെയ്ത ബന്ദു മാന്‍ സിങ് സെഖോണിനെ ചോദ്യം ചെയ്തപ്പോഴാണ് ഇവരുടെ പേരുകള്‍ പുറത്തുവന്നത്. സീപു ആണ് ആക്രമണത്തിന് പിന്നിലെ മുഖ്യസൂത്രധാരനെന്നും ഇയാളുടെ നിര്‍ദേശപ്രകാരമാണ് ദല്‍ജോതും ഷാരിയും കഫേയ്‌ക്ക് നേരെ ആക്രമണം നടത്തിയതെന്നും വ്യക്തമായി. പ്രതികള്‍ക്ക് ആയുധങ്ങള്‍ നല്‍കിയത് താനാണെന്നും പാകിസ്ഥാനില്‍ കടത്തിയ ആയുധങ്ങളാണ് നല്‍കിയതെന്നും ഇയാള്‍ വെളിപ്പെടുത്തി. പാകിസ്ഥാന്‍ ആസ്ഥാനമാക്കി പ്രവര്‍ത്തിക്കുന്ന ഗുണ്ടാസംഘം ഹാരി ചാത്തയുമായി അടുത്ത ബന്ധമുള്ളയാളാണ് ബന്ദു മാന്‍ സിങ് എന്ന് പോലീസ് നേരത്തെ കണ്ടെത്തിയിരുന്നു.
കുറ്റവാളികളെ കണ്ടെത്തുന്നതിനും പിടികൂടുന്നതിനുമായി കേന്ദ്ര ഏജന്‍സികള്‍ ഇപ്പോള്‍ കനേഡിയന്‍ അധികാരികളുമായി സഹകരിച്ചാണ് പ്രവര്‍ത്തിക്കുന്നത്.
കാനഡയിലെ സറേയിലുള്ള കപില്‍ ശര്‍മ്മയുടെ കാപ്‌സ് കഫേയ്‌ക്ക് നേരെ ജൂലൈ 10, ആഗസ്ത് 7, ഒക്ടേബര്‍ 16 എന്നീ തീയതികളിലാണ് വെടിവെപ്പുണ്ടായത്. സംഭവത്തിന് ശേഷം കപില്‍ ശര്‍മ്മയുടെ സുരക്ഷ വര്‍ദ്ധിപ്പിച്ചു.
