തിരുവനന്തപുരം: കെട്ടിക്കിടക്കുന്ന പത്ര പ്രവര്‍ത്തക പെന്‍ഷന്‍ അപേക്ഷകളില്‍ നടപടികള്‍ വേഗത്തിലാക്കണമെന്നാവശ്യപ്പെട്ട് മുഖ്യമന്ത്രിക്ക് കേരള പത്രപ്രവര്‍ത്തക യൂണിയന്‌റെ കത്ത്. അപേക്ഷകളില്‍ ഏറെയും അനേകവര്‍ഷങ്ങളായി കാത്ത് നില്‍ക്കുന്നവരുടേതാണെന്ന് കത്തില്‍ ചൂണ്ടിക്കാട്ടുന്നു.
ആറുവര്‍ഷത്തിലേറെയായി കെട്ടിക്കിടക്കുന്നവ അടക്കം പുതിയ പെന്‍ഷന്‍ അപേക്ഷകള്‍ പരിഗണിച്ചു തീര്‍പ്പാക്കാനുള്ള തീരുമാനത്തെ സ്വാഗതം ചെയ്യുന്നു. അംഗത്വത്തിന് കെട്ടിക്കിടക്കുന്ന അപേക്ഷകളുടെ രേഖകള്‍ ഓണ്‍ലൈന്‍ ആക്കുന്നതിനായി ജില്ലാ ഓഫീസുകളിലേക്ക് അയച്ച് നടപടികള്‍ വേഗത്തിലാക്കും എന്നാണ് തുടക്കത്തില്‍ അറിയിച്ചിരുന്നതെങ്കിലും കാര്യമായ പുരോഗതിയില്ല.
പ്രോസസിങ് നടപടി പൂര്‍ത്തിയായി അംഗത്വം ലഭിക്കുന്ന വര്‍ഷങ്ങള്‍ പഴക്കമുള്ള അപേക്ഷകരില്‍ നിന്ന് പോലും അംശദായത്തിന്മേല്‍ പിഴപ്പലിശ ഈടാക്കുന്നു. പ്രോസസിങ് വൈകിയതിന് ഇവര്‍ ഉത്തരവാദികള്‍ അല്ലാത്തതിനാല്‍ ഇവരുടെ പിഴപ്പലിശ ഒഴിവാക്കി കിട്ടുന്നതിന് വേണ്ട നടപടി സ്വീകരിക്കണമെന്നും ‘കത്തില്‍ ആവശ്യപ്പെട്ടിട്ടുണ്ട്.
