തിരുവനന്തപുരം: ജമാഅത്തെ ഇസ്ലാമി സിപിഎമ്മിനും കോണ്ഗ്രസിനും രാഷ്ട്രീയ പിന്തുണ നല്കിയിട്ടുണ്ടെന്നാണ് കഴിഞ്ഞദിവസത്തെ മുഖ്യമന്ത്രിയുടെ വെളിപ്പെടുത്തല് വ്യക്തമാക്കുന്നതെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. ജമാഅത്തെ ഇസ്ലാമി അപകടകരമായ രാഷ്ട്രീയത്തിന്റെ പ്രതീകമാണ്. ഒരു ഇസ്ലാമിക രാഷ്ട്രം രൂപികരിക്കാന് പ്രവര്ത്തിക്കുന്ന സംഘടനയോട് സഖ്യം ചേരുകയാണ് സിപിഎമ്മും കോണ്ഗ്രസും കേരളത്തില് ചെയ്യുന്നതെന്നും അദ്ദേഹം ആരോപിച്ചു.
നമ്മുടെ ജനാധിപത്യ സംവിധാനത്തെ ഇത്തരം മത തീവ്രവാദ സംഘടനകള് നിയന്ത്രിക്കുന്നത് അപകടകരമായ കാര്യമാണ്. നാടിന് അപകടമാണോ ജനങ്ങളെ ബാധിക്കുന്നതാണോ എന്നൊന്നും നോക്കാതെ രാഷ്ട്രീയ ലക്ഷ്യം മാത്രം നോക്കുകയാണ് ഇടതുവലത് മുന്നണികള്. ഈ അപകടകരമായ രാഷട്രീയത്തിന് വിരാമിടാന് കേരളീയ പൊതു സമൂഹം എന്ഡിഎയ്ക്ക് വോട്ടുചെയ്യാന് തയ്യാറാവണമെന്നും അദ്ദേഹം പറഞ്ഞു.
കഴിഞ്ഞ 24 മണിക്കൂറായി മുഖ്യമന്ത്രിയും ചില കോണ്ഗ്രസ് നേതാക്കളും ചര്ച്ച ചെയ്യുന്നത് കേരളത്തിന്റെ താല്പര്യം ആര് സംരക്ഷിക്കുമെന്നാണ്. മാറി മാറി ഭരിച്ച സിപിഎമ്മും കോണ്ഗ്രസും ജനങ്ങള്ക്കായി എന്തു ചെയ്തു എന്ന ചോദ്യമാണ് ജനങ്ങള് ചോദിക്കുന്നത്. അതുതന്നെയാണ് ഞങ്ങളും ചോദിക്കുന്നത്. 2004 മുതല് പത്ത് വര്ഷം സിപിഎമ്മിന്റെ പിന്തുണയോടെ യുപിഎ ഭരിച്ചപ്പോള് എട്ട് മന്ത്രിമാര് ഉണ്ടായിരുന്നു. അവര് ഈ നാടിനായി എന്തെങ്കിലും ചെയ്തോ. നാട്ടിലെ ചെറുപ്പക്കാര്ക്കായി തൊഴിലവസരങ്ങള് സൃഷ്ടിച്ചില്ല. ഇന്ന് ഏറ്റവും വലിയ തൊഴിലില്ലായ്മയാണ് കേരളം നേരിടുന്നത്. കേരളത്തിലെ സാധാരണക്കാര് നേരിടുന്ന വിലക്കയറ്റം നിയന്ത്രിക്കാന് ഇരുമുന്നണികളും ഒന്നും ചെയ്തില്ല.
നാട്ടിലെ അയ്യപ്പഭക്തരുടെ വിശ്വാസം സംരക്ഷിക്കാനായി ഇരുമുന്നണികളും ഒന്നും ചെയ്തില്ലെന്ന് മാത്രമല്ല, ശബരിമലയില് നിന്ന് നാലരക്കിലോ സ്വര്ണം കൊള്ളയടിക്കുകയും ചെയ്തു. കഴിഞ്ഞ 20 കൊല്ലമായി, ദേവസ്വം ബോര്ഡിനെ ദള്ളാള്മാരുടെ കേന്ദ്രമാക്കി മാറ്റിയതും ഈ രണ്ട് മുന്നണികള് തന്നെയാണ്. എസ്ഡിപിഐ- ജമാഅത്തെ ഇസ്ലാമിപോലുള്ള സംഘടനകളെ നമ്മുടെ രാഷ്ട്രീയത്തിലേക്ക് കൊണ്ടുവന്നതും ഈ സിപിഎമ്മും കോണ്ഗ്രസും തന്നെയാണ്. വികസനമില്ലായ്മ, അഴിമതി കുറ്റകരമായ അനാസ്ഥ, കഴിവില്ലായ്മ ഇതൊക്കെയാണ് കാലങ്ങളായി മാറിമാറി വന്ന സര്ക്കാരുകള് കേരളത്തിലെ ജനങ്ങള്ക്ക് നല്കിയിരിക്കുന്നത്.
എത്രയോ തവണ ജനങ്ങള് അവസരം കൊടുത്തിട്ടും ജനങ്ങള്ക്കായി ഒന്നും കൊടുത്തില്ല. ഈ നാട്ടിലെ ജനങ്ങളുടെ താല്പര്യം സംരക്ഷിക്കാനായി എന്തെങ്കിലും ചെയ്തിട്ടുണ്ടെങ്കില് അത് നരേന്ദ്രമോദി സര്ക്കാര് മാത്രമാണ്. കോണ്ഗ്രസ് ഭരിച്ചപ്പോള് കേരളത്തിന് ലഭിച്ചതിനേക്കാള് സഹായങ്ങളാണ് നരേന്ദ്രേമോദി സര്ക്കാര് കേരളത്തിനായി നല്കിയതെന്നും രാജീവ് ചന്ദ്രശേഖര് പ്രസ്താവിച്ചു.
