കോഴിക്കോട്: തിളക്കം എന്ന പേരില് കോഴിക്കോട് കോര്പ്പറേഷന്റെ പ്രോഗ്രസ് റിപ്പോര്ട്ട് തിരഞ്ഞെടുപ്പ് ചട്ടലംഘനമെന്ന് ജില്ലാ കളക്ടര് സ്നേഹില് കുമാര് സിംഗ്.വിതരണം നിര്ത്തിവെക്കാന് ആവശ്യപ്പെട്ടിട്ടുണ്ട്.ഇതുമായി ബന്ധപ്പെട്ട റിപ്പോര്ട്ട് കോര്പ്പറേഷന് സെക്രട്ടറിയോട് ആവശ്യപ്പെട്ടിട്ടും ഇതുവരെ ലഭിച്ചിട്ടില്ലെന്നും കളക്ടര് പറഞ്ഞു.
എന്നാല്, ചട്ടലംഘനമില്ലെന്നും വസ്തുത പരിശോധിക്കാതെയാണ് കളക്ടറുടെ നടപടിയെന്നുമാണ് എല്ഡിഎഫിന്റെ വിശദീകരണം
കോര്പ്പറേഷന് പുറത്തിറക്കിയ പ്രോഗ്രസ് റിപ്പോര്ട്ടിനെതിരെ യുഡിഎഫ്,ഡെപ്യൂട്ടി കളക്ടര് ഷാമിന് സെബാസ്റ്റ്യന് പരാതി നല്കിയിരുന്നു. ഈ റിപ്പോര്ട്ട് ചട്ടവിരുദ്ധമാണെന്നും ഭരണസമിതി ഫണ്ട് ഉപയോഗിച്ചാണ് ഇത് ഇറക്കിയത് എന്നുമാണ് യു.ഡി എഫിന്റെ പരാതി. ഇതിന് പിന്നാലെ ഇതിന്റെ വിതരണം നിര്ത്തിവെക്കാന് കളക്ടര് ആവശ്യപ്പെട്ടു. ചട്ടലംഘനം നടന്നതായാണ് പ്രാഥമികമായി മനസിലാക്കാനായതെന്ന് കളക്ടര് പറഞ്ഞു.
അതേസമയം, ഒക്ടോബറില് നടന്ന വികസന ചര്ച്ചയുടെ ഭാഗമായുള്ള രേഖ നേരത്തെ തന്നെ പ്രസിദ്ധീകരിച്ചതാണെന്നാണ് എല്ഡിഎഫ് പറയുന്നത്.എല്ലാ കൗണ്സിലര്മാരുടെയും ഫോട്ടോ ഉള്ള നഗര വികസന രേഖ ആണ് ഇത്. വിഷയത്തില് മുഖ്യ തെരഞ്ഞെടുപ്പ് ഓഫീസര്ക്ക് റിപ്പോര്ട്ട് നല്കുമെന്ന് കളക്ടര് അറിയിച്ചു.
