കൊച്ചി: കൊച്ചിയിലും ദല്‍ഹിയിലുമായി ഡിആര്‍ഐ നടത്തിയ പരിശോധനയില്‍ ഏഴുകോടിയുടെ ഹൈഡ്രോപോണിക് ലഹരിമരുന്നും കണക്കില്‍പ്പെടാത്ത 34.8 ലക്ഷം രൂപയും പിടിച്ചെടുത്തു. ലഹരി കള്ളക്കടത്തിനെതിരായ തുടര്‍ച്ചയായ നടപടികളുടെ ഭാഗമായാണ് ഡയറക്ടറേറ്റ് ഓഫ് റവന്യൂ ഇന്റലിജന്‍സ് (ഡിആര്‍ഐ) കൊച്ചി മേഖല യൂണിറ്റിന്റെ നേതൃത്വത്തില്‍ ദല്‍ഹി വിമാനത്താവളം, കൊച്ചി വിമാനത്താവളം, കൊച്ചിയിലെ ചില പ്രത്യേക ഇടങ്ങള്‍ എന്നിവിടങ്ങളില്‍ ഏകോപിപ്പിച്ചുള്ള പ്രവര്‍ത്തനം നടത്തിയത്.
ലഹരിക്കടത്ത് സംഘത്തിലെ അംഗങ്ങള്‍ വിവിധ സ്ഥലങ്ങളിലേക്ക് വ്യോമമാര്‍ഗം ലഹരിവസ്തുക്കള്‍ കൊണ്ടുപോകുന്നതായ രഹസ്യവിവരത്തെത്തുടര്‍ന്ന് നടത്തിയ പരിശോധനയില്‍, ഒരു യാത്രക്കാരനെ ദല്‍ഹി വിമാനത്താവളത്തില്‍ നിന്നും മറ്റൊരു യാത്രക്കാരനെ കൊച്ചി വിമാനത്താവളത്തില്‍ നിന്നും പിടികൂടി. ഇവരില്‍ നിന്നാണ് അന്താരാഷ്‌ട്ര വിപണിയില്‍ ഏഴു കോടി രൂപ മൂല്യമുള്ള തായ്ലന്‍ഡില്‍ നിന്നുള്ള ഏഴു കിലോ ഹൈഡ്രോപോണിക് ലഹരിവസ്തുക്കള്‍ പിടിച്ചെടുത്തത്.
കൊച്ചിയിലെ വിവിധ സ്ഥലങ്ങളില്‍ നടത്തിയ തെരച്ചിലില്‍ ലഹരിക്കടത്ത് ശൃംഖലയുടെ ഭാഗമായ കേരളത്തില്‍ നിന്നുള്ള ഒരു സംഘാടകനും കോര്‍ഡിനേറ്ററും ദല്‍ഹിയില്‍ നിന്നുള്ള ഒരു കൂട്ടാളിയും പിടിയിലായി. ഇവരില്‍ നിന്നാണ് കണക്കില്‍പ്പെടാത്ത 34.8 ലക്ഷം രൂപ പിടിച്ചെടുത്തത്. ഇത് മുന്‍പ് നടത്തിയ രാസലഹരി കയറ്റുമതിയില്‍ നിന്നുള്ള തുകയാണെന്ന് സംശയിക്കുന്നു.
കേസുമായി ബന്ധപ്പെട്ട് ആകെ അഞ്ച് പേരെ അറസ്റ്റ് ചെയ്തിട്ടുണ്ട്. ഏതാനും നാളുകളായി രാജ്യത്തേക്ക് രാസലഹരി കടത്തുന്നതില്‍ ഈ സംഘത്തിന് പങ്കുണ്ടെന്നാണ് പ്രാഥമിക കണ്ടെത്തല്‍. ഇതില്‍ കൂടുതല്‍ അന്വേഷണം പുരോഗമിക്കു കയാണ്.
ഈ സാമ്പത്തിക വര്‍ഷം ഡിആര്‍ഐ കൊച്ചി മേഖല യൂണിറ്റ്, കേരളത്തില്‍ നിന്ന് 47 കോടി വിലമതിക്കുന്ന ലഹരിവസ്തുക്കളും സൈക്കോട്രോപിക് വസ്തുക്കളും (എന്‍ഡിപിഎസ്) പിടിച്ചെടുത്തു. ഇതുമായി ബന്ധപ്പെട്ട്, പത്ത് വ്യക്തികളെ അറസ്റ്റ് ചെയ്തിട്ടുണ്ട്. നശാ മുക്ത് ഭാരത് (ലഹരിമുക്ത ഇന്ത്യ) എന്ന കേന്ദ്രഗവണ്‍മെന്റിന്റെ ദര്‍ശനത്തോടുള്ള ഡിആര്‍ഐയുടെ പ്രതിജ്ഞാബദ്ധതയാണ് തുടര്‍ച്ചയായ ഈ ശ്രമങ്ങളില്‍ പ്രതിഫലിപ്പിക്കുന്നതെന്ന് ഉദ്യോഗസ്ഥര്‍ വ്യക്തമാക്കി.
