ആലപ്പുഴ: തെരഞ്ഞെടുപ്പ് പ്രചാരണത്തില്‍ എന്‍ഡിഎ സ്ഥാനാര്‍ത്ഥി അര്‍ച്ചന ആര്‍. മുന്നേറുന്നത് സ്വയം ആലപിച്ച വൈറല്‍ ഗാനത്തിന്റെ അകമ്പടിയില്‍. ഗായികയായ അര്‍ച്ചന ആലപ്പുഴ നഗരസഭയിലെ പാലസ് വാര്‍ഡിലെ ബിജെപി സ്ഥാനാര്‍ത്ഥിയാണ്. പ്രചാരണഗാനം ഇന്ന് സമൂഹമാദ്ധ്യമങ്ങളില്‍ വൈറലാണ്. പാട്ടെഴുതിയത് അര്‍ച്ചനയുടെ ഭര്‍ത്താവ് രംഗനാഥ് എസ്. അണ്ണാവി. സംഗീതം നല്‍കിയത് അനില്‍ ഗോപാലന്‍.
”എന്റെ സ്വപ്നശോഭയാര്‍ന്ന് ഉദിക്കുമീ ദിനങ്ങളില്‍ പങ്കുചേര്‍ന്ന് നേടിടാം നമുക്ക് നല്ല നാളുകള്‍, പൊന്‍താമരയ്‌ക്ക് വോട്ട് ചെയ്ത് നല്‍കി നമ്മള്‍ ഒന്നു ചേര്‍ന്നിടാം…എന്ന ഗാനം പാലസ് വാര്‍ഡില്‍ മാത്രമല്ല, സഹൃദയരൊന്നാകെ വരവേല്‍ക്കുകയാണ്.
നാദവര്‍ഷിണി ഭജന്‍സില്‍ അംഗമായ അര്‍ച്ചന നിരവധി സദസുകളില്‍ ആലപിച്ചിട്ടുണ്ട്. തെരഞ്ഞെടുപ്പിന്റെ തലേന്ന് മുല്ലയ്‌ക്കല്‍ ക്ഷേത്രത്തിലും ഭജനുണ്ട്. ശ്രീനാരായണഗുരുവിന്റെ ജനനീ നവരത്നമഞ്ജരി നാദവര്‍ഷിണി കാവ്യ ഭംഗി നിലനിര്‍ത്തി ആലപിച്ചത് ഏറെ ശ്രദ്ധനേടിയിരുന്നു.
നാടിന്റെ വികസനത്തിന് എന്തുകൊണ്ട് എന്‍ഡിഎയും ബിജെപിയും ജയിക്കണമെന്ന് വോട്ടര്‍മാരെ ബോദ്ധ്യപ്പെടുത്തിയാണ് അര്‍ച്ചനയുടെ പ്രചാരണം. മോദി സര്‍ക്കാരിന്റെ വികസന നേട്ടങ്ങള്‍ ഉയര്‍ത്തിക്കാട്ടിയും, രാഷ്‌ട്രീയം പറയേണ്ടിടത്ത് പറഞ്ഞും ഈ ഗായിക മുന്നേറുകയാണ്.
