ഭാരതം-റഷ്യ ഉച്ചകോടിയില്‍ നിര്‍ണായക തീരുമാനങ്ങള്‍: ഭീകരതക്കെതിരെ ഒറ്റക്കെട്ട്, തടസമില്ലാതെ ഊര്‍ജ്ജം

ന്യൂദല്‍ഹി: സൗഹൃദവും സഹകരണവും മെച്ചപ്പെടുത്താനും ഭാരതം- റഷ്യ ബന്ധം കൂടുതല്‍ ഉയരങ്ങളിലെത്തിക്കാനും പ്രധാനമന്ത്രി നരേന്ദ്ര മോദിയും പ്രസിഡന്റ് വ്ളാദിമീര്‍ പുടിനും തമ്മിലെ ചര്‍ച്ചയില്‍ തീരുമാനമായി. 23-ാമത് ഭാരതം- റഷ്യ ഉച്ചകോടിയിലാണ് സഹകരണത്തിന്റെ മേഖലകള്‍ കൂടുതല്‍ ദൃഢവും ആഴത്തിലുള്ളതുമാക്കാന്‍ ധാരണയായത്. ഹൈദരാബാദ് ഹൗസിലെ ഉച്ചകോടിക്കുശേഷം മോദിയും പുടിനും സംയുക്ത വാര്‍ത്താ സമ്മേളനത്തിലാണ് തീരുമാനങ്ങള്‍ പ്രഖ്യാപിച്ചത്. 2030 വരെയുള്ള ഭാരതം- റഷ്യ സാമ്പത്തിക സഹകരണ പദ്ധതിയാണ് കരാറില്‍ പ്രധാനം. ഭീകരതയ്‌ക്കെതിരേ ഒന്നിച്ചുള്ള പോരാട്ടം തുടരും. ഭാരതത്തിന് തടസമില്ലാതെ എണ്ണ വിതരണം ഉറപ്പാക്കും. വ്യാപാര ബന്ധം ശക്തവും വിപുലവുമാക്കും. ഊര്‍ജ്ജം, രാജ്യസുരക്ഷ, പ്രതിരോധം, ശാസ്ത്ര സാങ്കേതികം തുടങ്ങി വിവിധ മേഖലകളിലാണ് ഒപ്പുവെച്ച എട്ട് കരാറുകള്‍.

1. ഭാരതം- റഷ്യ സാമ്പത്തിക സഹകരണ പദ്ധതി 2030 വരെയുള്ള വ്യാപാര, നിക്ഷേപക്കരാറാണ്.

2. അതിവേഗം വളരുന്ന ഭാരതത്തിന് തടസമില്ലാതെ എണ്ണ നല്കും.

3. കൂടംകുളം ആണവ നിലയത്തിലെ ആറ് റിയാക്ടര്‍ യൂണിറ്റുകളില്‍ രണ്ടെണ്ണം ഊര്‍ജ്ജ ശൃംഖലയുമായി ബന്ധിപ്പിച്ചു. നാലെണ്ണം നിര്‍മാണത്തിലാണ്. ഇത് വേഗം പൂര്‍ത്തിയാക്കും.

4. ഭാരതം- റഷ്യ വാര്‍ഷിക ഉഭയകക്ഷി വ്യാപാരം നൂറ് ബില്യണ്‍ ഡോളറിലേക്കുയര്‍ത്തും.

5. പഹല്‍ഗാമിലും മോസ്‌കോ ക്രോക്കസ് സിറ്റി ഹാളിലും നടന്ന ഭീകരാക്രമണത്തെ അപലപിച്ചു. ഭീകരത, സംഘടിത കുറ്റകൃത്യങ്ങള്‍, കള്ളപ്പണം വെളുപ്പിക്കല്‍, മയക്കുമരുന്നു കടത്ത് തുടങ്ങിയ പൊതു വെല്ലുവിളികളെ ഒന്നിച്ച് നേരിടും.
6. റഷ്യന്‍ പൗരന്മാര്‍ക്ക് 30 ദിവസത്തെ സൗജന്യ ഇ ടൂറിസ്റ്റ് വിസയും 30 ദിവസത്തെ ഗ്രൂപ്പ് ടൂറിസ്റ്റ് വിസയും.

7. ഭാരത തൊഴിലാളികള്‍ക്ക് റഷ്യയില്‍ കൂടുതല്‍ ജോലി അവസരങ്ങള്‍. തൊഴിലാളി കൈമാറ്റം, സുരക്ഷ, റിക്രൂട്ട്മെന്റ് മാനദണ്ഡങ്ങള്‍, പരിശീലനം തുടങ്ങിയവയും ഇതില്‍പ്പെടും.

റഷ്യ- ഉക്രൈന്‍ സംഘര്‍ഷം അവസാനിപ്പിക്കാനുള്ള ശ്രമങ്ങള്‍ക്ക് പൂര്‍ണ പിന്തുണ നല്‍കുമെന്നും പ്രധാനമന്ത്രി നരേന്ദ്രമോദി. ഭാരതം നിഷ്പക്ഷമല്ല, എന്നും സമാധാനത്തിന്റെ പക്ഷത്താണ്.

പുടിന്റെ സന്ദര്‍ശനം ചരിത്രപരമാണ്. ഭാരതവുമായി തന്ത്രപരമായ പങ്കാളിത്തം സ്ഥാപിക്കുന്നതില്‍ പുടിന്റെ പങ്ക് ഏറെ പ്രധാനമാണ്. പുടിന്റെ സന്ദര്‍ശനത്തെ ചരിത്രപരം എന്ന് മോദി വിശേഷിപ്പിച്ചു. 2001ല്‍ പ്രധാനമന്ത്രി വാജ്പേയിക്കൊപ്പം റഷ്യ സന്ദര്‍ശിച്ച കാര്യം അദ്ദേഹം അനുസ്മരിച്ചു.

ഉച്ചകോടിക്ക് മുന്നോടിയായി രാഷ്‌ട്രപതി ഭവനില്‍ രാഷ്‌ട്രപതി ദ്രൗപദി മുര്‍മുവിന്റെ നേതൃത്വത്തില്‍ പുടിന് ആചാരപരമായ സ്വീകരണം നല്‍കി. തുടര്‍ന്ന് അദ്ദേഹം രാജ്ഘട്ടിലെത്തി ഗാന്ധിജിക്ക് ആദരാഞ്ജലി അര്‍പ്പിച്ചു. വൈകിട്ട് ഭാരതമണ്ഡപത്തില്‍ ഭാരതം- റഷ്യ ബിസിനസ് ഫോറത്തെ മോദിയും പുടിനും അഭിസംബോധന ചെയ്തു. രാഷ്‌ട്രപതി റഷ്യന്‍ പ്രസിഡന്റിനായി അത്താഴ വിരുന്ന് ഒരുക്കി.