കൊച്ചി: രാഷ്‌ട്രീയ ദൃഢതയുള്ള ജില്ലകളായ കണ്ണൂര്‍, മലപ്പുറം, തൃശൂര്‍ എന്നിവയിലൊന്നായ തൃശ്ശൂരിനെ എടുക്കാന്‍ കഴിഞ്ഞെങ്കില്‍ കൊച്ചിയും വിദൂരത്തിലല്ലെന്ന് കേന്ദ്ര-മന്ത്രി സുരേഷ് ഗോപി. ഇതിനുള്ള വ്യക്തമായ തെളിവുകള്‍ നമ്മുടെ പക്കലുണ്ട്. രവിപുരത്ത് നടന്ന കൊച്ചിന്‍ കോര്‍പ്പറേഷന്റെ സ്ഥാനാര്‍ഥി സംഗമത്തില്‍ സംസാരിക്കുകയായിരുന്നു അദ്ദേഹം.
മുനമ്പത്ത് എന്താണ് സംഭവിച്ചതെന്ന് മുനമ്പത്തുകാര്‍ക്കറിയാം, കേരളത്തിനുമറിയാം. വഖഫ് ആക്ട് വഴി നിങ്ങള്‍ക്ക് ലഭിക്കുന്ന ആനുകൂല്യങ്ങള്‍ കേന്ദ്രത്തിന്റെ ഇടപെടലുകള്‍കൊണ്ടാണെന്ന് ജനങ്ങള്‍ മനസിലാക്കണം. നിയമത്തിന്റെ പരിരക്ഷയില്ലാതെ കോടതിയെ സമീപിക്കാന്‍ പോലും ജനങ്ങള്‍ക്ക് ആവില്ലെന്നും ഓരോവ്യക്തിയുടെ സുരക്ഷ മുന്നില്‍ കണ്ടുള്ള നിയമനിര്‍മാണമാണിതെന്നും അദ്ദേഹം പറഞ്ഞു.
അതില്‍ മറ്റൊരു രാഷ്‌ട്രീയവും കലര്‍ന്നിട്ടില്ല. കൊച്ചിന്‍ കോര്‍പ്പറേഷനെ വന്‍തോതില്‍ സഹായിക്കുന്നത് മെട്രോയാണ്. കൊച്ചി സിറ്റിയിലെ മെട്രോ സര്‍വീസ് ശക്തമാക്കിക്കൊണ്ടിരിക്കുകയാണ് കേന്ദ്രം ചെയ്യുന്നത്. മെട്രോ കോയമ്പത്തൂര്‍ വരെ എത്തിയാലേ അത് പൂര്‍ണതിയിലെത്തൂ. മെട്രോയ്‌ക്ക് വേണ്ടുന്ന സ്ഥലമെടുപ്പിന് വേണ്ട നടപടികള്‍ സര്‍ക്കാര്‍ സ്വീകരിക്കണം. അതിന് തയ്യാറായില്ലെങ്കില്‍ അടുത്ത മെയ് മാസത്തില്‍ ആര് സംസ്ഥാനം ഭരിക്കണമെന്ന് ജനങ്ങള്‍ തീരുമാനിക്കണം. ഭരണം പിടിച്ചെടുക്കുക എന്നതിന് തെന്ന മുന്‍ഗണന നല്‍കണം.
കൊച്ചി നഗരത്തിലെ വെള്ളക്കെട്ടിന് പരിഹാരം, ദേശീയ ജല്‍ മിഷന്‍ ഉള്‍പ്പെടെ നടപ്പിലാക്കാന്‍ ട്രിപ്പിള്‍ എന്‍ജിന്‍ സര്‍ക്കാര്‍ വേണമെന്നും അദ്ദേഹം പറഞ്ഞു. രവിപുരത്ത് നടന്ന സമ്മേളനത്തില്‍ ബിജെപി സിറ്റി ജില്ലാ പ്രസിഡന്റ് കെ.എസ്. ഷൈജു, സംസ്ഥാന വൈസ് പ്രസിഡന്റ് ഉണ്ണികൃഷ്ണന്‍ മാസ്റ്റര്‍, എന്‍ഡിഎ സ്ഥാനാര്‍ത്ഥികളായ ടി.പി. സിന്ധുമോള്‍,
സി.ജി. രാജഗോപാല്‍, പ്രിപ്തി രാജ്, അനില്‍ കുമാര്‍ എ.ബി, കെ.ആര്. വേണുഗോപാല്‍, സുനിത ഡിക്‌സണ്‍, ശാരദമണി, മഞ്ജുഷ രാജീവന്‍, ഐശ്വര്യ പി. എന്നിവര്‍ പങ്കെടുത്തു.
.
