പാലക്കാട്: സംസ്ഥാനം സാമ്പത്തിക പ്രതിസന്ധിയിലെന്ന് പിണറായി സര്ക്കാര് ആവര്ത്തിക്കുമ്പോള് മുഖ്യമന്ത്രിയുടെ ഓഫീസ് ജീവനക്കാര്ക്കുള്ള ശമ്പള ഇനത്തില് ചിലവാകുന്നത് കാല് കോടിയിലധികം രൂപ. പ്രൈവറ്റ് സെക്രട്ടറി, പ്രസ് സെക്രട്ടറി, പൊളിറ്റിക്കല് സെക്രട്ടറി മുതല് പാചകക്കാര് ഉള്പ്പെടെ ആകെ 32 പേരാണ് മുഖ്യമന്ത്രിയുടെ ഓഫീസ് ജീവനക്കാര്.ഇവരുടെ ശമ്പള ഇനത്തില് പ്രതിമാസം 26 ലക്ഷത്തോളം രൂപയാണ് ഖജനാവില് നിന്ന് മാറ്റിവെക്കുന്നത്. വിവരാവകാശ നിയമപ്രകാരം ലഭിച്ച മറുപടിയിലാണ് ഇതുസംബന്ധിച്ച വിവരങ്ങള് പുറത്തുവന്നത്.
പ്രൈവറ്റ് സെക്രട്ടറി, സ്പെഷ്യല് പ്രൈവറ്റ് സെക്രട്ടറി, പ്രസ് സെക്രട്ടറി, പൊളിറ്റിക്കല് സെക്രട്ടറി, സെക്രട്ടറി കം മീഡിയ എന്നിങ്ങനെ ഒരാള് വീതമാണ് ജോലിയില് ഉള്ളതെങ്കില് അഡീ. പ്രൈവറ്റ് സെക്രട്ടറിമാര് അഞ്ച് പേരുണ്ട്. നാല് അസിസ്റ്റന്റ് പ്രൈവറ്റ് സെക്രട്ടറി, ആറ് ഓഫീസ് അറ്റന്ഡന്റ്, അസിസ്റ്റന്റുമാരായി മൂന്ന് പേരും ജോലി ചെയ്യുന്നുണ്ട്. ശമ്പളത്തിനു പുറമെ അലവന്സും നല്കുന്നുണ്ട്. നിയമസഭ സമ്മേളന കാലയളവില് ഓഫീസ് അറ്റന്ഡര്മാര്ക്ക് പ്രതിദിനം 150 രൂപ വീതം ഓവര്ടൈം അലവന്സുമുണ്ട്. പേയ്മെന്റ് ഓഫ് സാലറീസ് ആന്ഡ് അലവന്സ് ആക്ട് 1951 നെ അടിസ്ഥാനപ്പെടുത്തിയാണ് ഇവര്ക്കെല്ലാം ശമ്പളം നല്കുന്നത്.
