തിരുവനന്തപുരം: നാവികസേന കഴിഞ്ഞ 78 വര്‍ഷത്തിനുള്ളില്‍ അത്ഭുതകരമായ വളര്‍ച്ചയില്‍ എത്തിയതായി ദക്ഷിണ നാവികസേനാ മേധാവി വൈസ് അഡ്മിറല്‍ സമീര്‍ സക്‌സേന. ഇതിനോടകം നിരവധി വെല്ലുവിളികളുണ്ടായി അതെല്ലാം നേരിടാന്‍ നാവികസേനയ്‌ക്കായതായും അദ്ദേഹം വാര്‍ത്താസമ്മേളനത്തില്‍ പറഞ്ഞു.
സായുധ സേനയുടെ കരുത്തും തന്ത്രപരമായ ദീര്‍ഘവീക്ഷണവും ‘ഓപ്പറേഷന്‍ സിന്ദൂര്‍’ തെളിയിച്ചു. ശത്രുവിന് മേല്‍ ആധിപത്യം സ്ഥാപിക്കുന്നതില്‍ നാവികസേന നിര്‍ണായക പങ്ക് വഹിക്കുന്നുണ്ട്. കഴിഞ്ഞ ഒരു വര്‍ഷത്തിനിടയില്‍ പടിഞ്ഞാറന്‍ അറബിക്കടലില്‍ കപ്പലുകള്‍ക്ക് നേരെയുള്ള ആക്രമണങ്ങള്‍ക്കും കടല്‍ക്കൊള്ളയ്‌ക്കുമെതിരെ 35 ലധികം കപ്പലുകളെ നാവികസേന വിന്യസിച്ചു. 30 ലധികം കേസുകളില്‍ ഇടപെടുകയും 1000ത്തിലധികം ബോര്‍ഡിങ് ഓപ്പറേഷനുകള്‍ നടത്തുകയും ചെയ്തു. ഈ നടപടികളിലൂടെ 520 ലധികം ജീവനുകള്‍ രക്ഷിക്കാന്‍ നാവികസേനയ്‌ക്ക് കഴിഞ്ഞതായും അദ്ദേഹം പറഞ്ഞു.
നിലവില്‍ നാവികസേനയുടെ സേനാ ബലത്തില്‍ 138 ലധികം കപ്പലുകളും അന്തര്‍വാഹിനികളും 264 ലധികം വിമാനങ്ങളും ഉള്‍പ്പെടുന്നു. പുതിയതായി 51 കപ്പലുകള്‍ വിവിധ കപ്പല്‍ ശാലകളില്‍ നിര്‍മ്മാണത്തിലാണ്. കൂടാതെ 65 കപ്പലുകള്‍ക്കും 9 അന്തര്‍വാഹിനികള്‍ക്കും അംഗീകാരം ലഭിച്ചിട്ടുണ്ട്.
‘ആത്മനിര്‍ഭര്‍ ഭാരത്’ എന്ന കാഴ്ചപ്പാടിന് കീഴില്‍ സേനയെ ആധുനികവത്കരിക്കാനും കപ്പലുകള്‍ വാങ്ങുന്ന നാവിക സേനയില്‍ നിന്ന് കപ്പലുകള്‍ നിര്‍മിക്കുന്ന നാവികസേനയിലേക്ക് മാറാനും നമുക്ക് കഴിഞ്ഞു. ഇന്ന് നമ്മുടെ കപ്പലുകളില്‍ 80 ശതമാനത്തിലധികം തദ്ദേശീയ ഘടകങ്ങളാണ് ഉപയോഗിക്കുന്നത്. ഏകദേശം 40 ദിവസത്തിലൊരിക്കല്‍ എന്ന കണക്കില്‍ യുദ്ധക്കപ്പലുകള്‍ കമ്മിഷന്‍ ചെയ്യുന്നുണ്ട്, അവയെല്ലാം തദ്ദേശീയമായി നിര്‍മിച്ചവയാണ്.
ഈ വര്‍ഷം ജനുവരിയില്‍ നീലഗിരി, സൂറത്ത്, അന്തര്‍വാഹിനിയായ വാഗ്ഷീര്‍ എന്നിങ്ങനെ മൂന്ന് പ്രധാന പ്ലാറ്റ്‌ഫോമുകള്‍ ഒരേ ദിവസം കമ്മിഷന്‍ ചെയ്യുന്നതിന് നാം സാക്ഷ്യം വഹിച്ചു. തുടര്‍ന്ന് അര്‍ണാല, തമാല്‍, ഉദയഗിരി, ഹിമഗിരി, നിസ്താര്‍, ആന്‍ഡ്രോത്ത്, ഇക്ഷക്, മാഹി തുടങ്ങിയവയും കമ്മിഷന്‍ ചെയ്തു. കപ്പല്‍ നിര്‍മാണത്തിലും പോരാട്ട ശേഷിയിലുമുള്ള നമ്മുടെ വളരുന്ന കരുത്താണ് ഇതിലൂടെ തെളിയിക്കുന്നത്.
കൊച്ചി ആസ്ഥാനമായി പ്രവര്‍ത്തിക്കുന്ന സതേണ്‍ നേവല്‍ കമാന്‍ഡിന് കീഴില്‍ ഏഴ് സംസ്ഥാനങ്ങളിലായി 32 നാവിക പരിശീലന യൂണിറ്റുകളുണ്ട്. വര്‍ഷം 1600 വ്യത്യസ്ത കോഴ്‌സുകളിലായി 13,000 ഉദ്യോഗസ്ഥരെ പരിശീലിപ്പിക്കുന്നു. ഏഴിമലയിലെ ഇന്ത്യന്‍ നേവല്‍ അക്കാദമി, ഗോവയിലെ നേവല്‍ വാര്‍ കോളജ്, ഐഎന്‍എസ് ശിവാജി, ഐഎന്‍എസ് വല്‍സുര തുടങ്ങിയ സ്ഥാപനങ്ങള്‍ സാങ്കേതിക വിദ്യയിലും നേതൃത്വത്തിലും മികച്ച പരിശീലനം നല്‍കുന്നു.
അഗ്‌നിപഥ് പദ്ധതി നടപ്പിലാക്കിയതോടെ ഐഎന്‍എസ് ചില്‍കയില്‍ അഗ്‌നിവീരന്മാരുടെ പ്രാഥമിക പരിശീലനം നടക്കുന്നു. 2022 മുതല്‍ 15,000 ത്തിലധികം പേരെ ഇവിടെ പരിശീലിപ്പിച്ചു. 50ലധികം വിദേശ രാജ്യങ്ങളില്‍ നിന്നുള്ള 21,000 ത്തിലധികം ഉദ്യോഗസ്ഥര്‍ക്ക് സതേണ്‍ നേവല്‍ കമാന്‍ഡ് പരിശീലനം നല്‍കിയിട്ടുണ്ട്. കഴിഞ്ഞ വര്‍ഷം മാത്രം 33 രാജ്യങ്ങളില്‍ നിന്നുള്ള 834 ട്രെയിനികള്‍ ഇവിടെ പരിശീലനം നേടി. സൗദി അറേബ്യ, ഒമാന്‍, മ്യാന്മര്‍, മൊറോക്കോ, ശ്രീലങ്ക തുടങ്ങിയ രാജ്യങ്ങളില്‍ നിന്നുള്ള പ്രതിനിധി സംഘങ്ങള്‍ നമ്മുടെ പരിശീലന സ്ഥാപനങ്ങള്‍ സന്ദര്‍ശിച്ചിട്ടുണ്ട്.
കൊച്ചി ആസ്ഥാനമായുള്ള ഫ്‌ലാഗ് ഓഫീസര്‍ സീ ട്രെയിനിങ് പരിശീലന കേന്ദ്രത്തില്‍ നാവികസേനയിലെ എല്ലാ കപ്പലുകളെയും ദൗത്യങ്ങള്‍ക്ക് അയക്കുന്നതിന് മുമ്പ് യുദ്ധസജ്ജമാക്കാന്‍ പ്രാപ്തരാക്കുന്നു. തദ്ദേശീയ വിമാനവാഹിനിക്കപ്പലായ ഐഎന്‍എസ് വിക്രാന്ത് മുതല്‍ ചെറിയ ബോട്ടുകള്‍ വരെ ഇത്തരത്തില്‍ സജ്ജമാക്കിയിട്ടുണ്ട്. ദക്ഷിണാഫ്രിക്കന്‍ നാവികസേന, മൗറീഷ്യന്‍ കോസ്റ്റ് ഗാര്‍ഡ്, മാല്‍ദീവ്‌സ് കോസ്റ്റ് ഗാര്‍ഡ് എന്നിവയുടെ കപ്പലുകള്‍ക്കും പരിശീലനം നല്‍കിയിട്ടുണ്ടെന്നും അദ്ദേഹം പറഞ്ഞു.
