കൊച്ചി: വഖഫ് ഭീകരതയ്‌ക്കെതിരേയുള്ള മുനമ്പം ജനതയുടെ സമരം കരുത്താര്‍ജ്ജിക്കുന്നു. ഭൂമിയുടെ റവന്യൂ അവകാശങ്ങള്‍ പുനഃസ്ഥാപിക്കുന്നതിനുള്ള തുടര്‍ സമരം ഇന്നലെ 415-ാം ദിനത്തിലേക്ക് കടന്നപ്പോള്‍ പിന്തുണയുമായി നൂറുകണക്കിന് ജനങ്ങളാണെത്തിയത്. എന്തു വില കൊടുത്തും സമരം മുന്നോട്ടുകൊണ്ടുപോകുമെന്ന് അവര്‍ പ്രഖ്യാപിച്ചു. കോട്ടപ്പുറം രൂപതാ പ്രീസ്റ്റ് ഇന്‍ ചാര്‍ജ് ഫാ. ഫ്രാന്‍സിസ് താനിയത്ത് സമരത്തിലുള്ള നാട്ടുകാര്‍ക്ക് പിന്തുണയുമായെത്തിയത് ആവേശം പകര്‍ന്നു.
കഴിഞ്ഞ ദിവസം ഒരുവിഭാഗം സമരത്തെ വഞ്ചിച്ച് മന്ത്രിമാരായ പി. രാജീവില്‍ നിന്നും കെ. രാജനില്‍ നിന്നും നാരങ്ങാനീര് വാങ്ങിക്കുടിച്ച് സമരം അവസാനിപ്പിച്ചിരുന്നു. എന്നാല്‍ സമരത്തെ ഒറ്റിക്കൊടുത്തവര്‍ ഒറ്റപ്പെടുന്നതാണ് ഇന്നലെ കണ്ടത്. അവരുടെ കള്ളക്കളികള്‍ ജനങ്ങള്‍ക്കു ബോധ്യപ്പെട്ടതോടെയാണ് സമരത്തിന് കരുത്തു കൂടിയത്.
പിരിച്ചുവിട്ട ഭൂസംരക്ഷണ സമിതി ഭാരവാഹികള്‍ക്കെതിരേ എന്‍ഐഎ അന്വേഷണം വേണമെന്ന ആവശ്യം ശക്തമായിട്ടുണ്ട്. ഇവരുടെ സ്വത്തുക്കള്‍ സംബന്ധിച്ച് അന്വേഷിക്കണമെന്ന് നാട്ടുകാര്‍ ആവശ്യപ്പെട്ടു. സമരത്തെ ഒറ്റിയവരോട് ഒരുതരത്തിലും പൊറുക്കാനാകില്ലെന്നും ഇവര്‍ പറഞ്ഞു.
