ഇന്ഡോര്(മധ്യപ്രദേശ്): ഡിസ്ക് ജോക്കി (ഡിജെ) പാര്ട്ടികള് മതിയാക്കി ധര്മ്മ ജാഗോ (ഡിജെ) എന്ന മഹത്വത്തിലേക്ക് യുവതലമുറ ഉയരണമെന്ന് ആര്എസ്എസ് സര്കാര്യവാഹ് ദത്താത്രേയ ഹൊസബാളെ. ഞാനും നീയും ഒരേ രക്തമാണ്, നമ്മള് ഭാരതമാതാവിന്റെ മക്കളാണ് എന്ന ഭാവമാണ് എല്ലാവരിലും ജ്വലിക്കേണ്ടതെന്ന് അദ്ദേഹം ചൂണ്ടിക്കാട്ടി. ആര്എസ്എസ് ശതാബ്ദിയുടെ ഭാഗമായി ജന്ജാതി വികാസ് മഞ്ച് സംഘടിപ്പിച്ച വനവാസി നേതൃയോഗത്തില് സംസാരിക്കുകയായിരുന്നു അദ്ദേഹം.
സ്വാശ്രയത്വം, വിദ്യാഭ്യാസം, ലഹരി വിമോചനം, സാമൂഹിക തിന്മകളുടെ ഉന്മൂലനം, മതപരിവര്ത്തനപ്രതിരോധം തുടങ്ങിയ മേഖലകളില് വനവാസി സമൂഹത്തില് നടക്കുന്ന പ്രവര്ത്തനങ്ങള് അദ്ദേഹം വിലയിരുത്തി. സാമൂഹ്യമാറ്റത്തിനായുള്ള എല്ലാ പരിശ്രമങ്ങളും പ്രശംസനീയമാണെന്നും മുന്നോട്ടുപോകണമെന്നും സര്കാര്യവാഹ് പറഞ്ഞു. ഭാരതം, ഭാരതാംബ, ഹിന്ദുത്വ തുടങ്ങിയവയെല്ലാം നമ്മുടെ അഭിമാനങ്ങളാണ്, തനിമയാണ്. ഭാഷ, പാരമ്പര്യം, വിശ്വാസങ്ങള്, പ്രകൃതി ആരാധന എന്നിവ സംരക്ഷിച്ചുകൊണ്ട് ഈ അഭിമാനങ്ങളെ ജ്വലിപ്പിക്കണം. അതിജീവനത്തിനായി വികസനത്തിന്റെയും സാങ്കേതികവിദ്യയുടെയും രംഗത്ത് മുന്നേറാന് കഴിയണമെന്ന് അദ്ദേഹം പറഞ്ഞു.
ഏകല് അഭിയാന്, കല്യാണ് ആശ്രമം, സേവാഭാരതി, ജന്ജതി വികാസ് മഞ്ച്, ജന്ജാതി സുരക്ഷ മഞ്ച് തുടങ്ങിയ വിവിധ സംഘടനകളും വനവാസിമേഖലകളിലെ സ്വയംസേവകരും ചേര്ന്ന് വിദ്യാഭ്യാസം, സ്വാശ്രയത്വം, കൃഷി, ധാര്മ്മജാഗരണം തുടങ്ങിയ മേഖലകളില് നടത്തുന്ന വിപ്ലവകരമായ മുന്നേറ്റം ശ്ലാഘനീയമാണെന്ന് അദ്ദേഹം ചൂണ്ടിക്കാട്ടി.
മാള്വ പ്രാന്ത സംഘചാലക് ഡോ. പ്രകാശ് ജി ശാസ്ത്രി, ഭീമനായക് വനാഞ്ചല് സമിതി പ്രസിഡന്റ് അജ്മീര് സിങ് ഭാബറും വേദിയില് സന്നിഹിതരായിരുന്നു.
