കൊച്ചി: കര്‍ത്താവിനെ ഒറ്റിക്കൊടുത്തതു പോലെ ഞങ്ങളെ ഒറ്റിക്കൊടുത്തെന്ന് മുനമ്പം സമരത്തിലെ മുതിര്‍ന്ന അംഗമായ ലിസി ആന്റണി ചിറയത്ത്. 230 ദിവസം നിരാഹാര സമരത്തില്‍ പങ്കെടുത്തതിന്റെ പോരാട്ട വീര്യം ജ്വലിക്കുന്ന ശബ്ദത്തിലാണ് ലിസി ഇതു പറയുന്നത്.
ഞങ്ങളുടെ ഭൂമിയില്‍ പൂര്‍ണമായ അവകാശം കിട്ടുന്നതുവരെ, അവരുടെ കടന്നുകയറ്റം അവസാനിക്കുന്നതുവരെ സമരം തുടരും. കമ്യൂണിസ്റ്റ് പാര്‍ട്ടിയില്‍ പ്രവര്‍ത്തിച്ച വരാണ് ഞങ്ങള്‍. ഞങ്ങള്‍ കമ്യൂണിസ്റ്റായതിനുശേഷമാണ് ഇവിടെ കമ്യൂണിസ്റ്റ് പാര്‍ട്ടി ഉണ്ടായത്. എംഎല്‍എമാരോ മന്ത്രിമാരോ തിരിഞ്ഞുപോലും നോക്കിയില്ല. റവന്യൂ അവകാശങ്ങള്‍ പുനഃസ്ഥാപിച്ചുകിട്ടുന്നതുവരെ സമരം തുടരുമെന്ന് പറഞ്ഞവര്‍ സമരം തീര്‍ന്നുവെന്ന് പറഞ്ഞപ്പോള്‍ നെഞ്ച് പിടഞ്ഞു. പട്ടയത്തിന് കടലാസിന്റെ വിലപോലും ഇല്ലാത്തതിനാല്‍ പണമില്ലാതെ ചികിത്സകിട്ടാതെ കാന്‍സര്‍ രോഗിയായ ഒരാള്‍ മരിച്ചത് സഹിക്കാനാകില്ല, ലിസി പറഞ്ഞു.
ഞങ്ങള്‍ക്കൊരു പാര്‍ട്ടിയുമില്ല. എന്നാല്‍ വഖഫ് നിയമം കൊണ്ടുവന്നതും അനുകൂലമായി നിന്നതും കേന്ദ്രസര്‍ക്കാരാണ്. മുനമ്പത്തെ സമരസമിതി കണ്‍വീനര്‍ തെരഞ്ഞെടുപ്പില്‍ സ്ഥാനാര്‍ത്ഥിയായതോടെ അവരുടെ രാഷ്‌ട്രീയ ലക്ഷ്യം വ്യക്തമാണല്ലോ. നീതിക്കൊപ്പം നില്ക്കുന്നവരുടെ കൂടെ ഞങ്ങളുണ്ടാകുമെന്നും ലിസി സമര പന്തലില്‍വച്ച് മാധ്യമങ്ങളോട് പറഞ്ഞു.
