തലശ്ശേരി: തലശ്ശേരി ജൂബിലി റോഡിന് സമീപം പണിതീരാത്ത കെട്ടിടത്തിൽ നിന്നും സ്ത്രീയുടെ തലയോട്ടി കണ്ടെത്തി. തലയോട്ടി കാണാതായ തമിഴ്‌നാട് സേലം സ്വദേശിനിയായ വയോധികയുടേതെന്നാണ് സംശയം.
സ്ത്രീയുടെ തലയോട്ടി കണ്ടെത്തിയത് പ്രദേശത്ത് വലിയ ആശങ്കയ്‌ക്ക് ഇടയാക്കി. മാസങ്ങളോളം പഴക്കമുള്ള തലയോട്ടിയാണ് കെട്ടിടത്തിൽ ഒളിപ്പിച്ച നിലയിൽ കണ്ടെത്തിയത്.
കാണാതായ തമിഴ്‌നാട് സേലം സ്വദേശിനിയായ വയോധികയുടേതാണ് ഈ തലയോട്ടിയെന്നാണ് പ്രാഥമിക നിഗമനം. വയോധികയുടെ മകൾ നൽകിയ പരാതിയുടെ അടിസ്ഥാനത്തിൽ തലശ്ശേരി പോലീസ് നടത്തിയ വിശദമായ അന്വേഷണത്തിലാണ് കെട്ടിടത്തിൽ നിന്ന് അസ്ഥികൂടത്തിന്റെ ഭാഗങ്ങൾ കണ്ടെത്തിയത്. തലയോട്ടിക്ക് ഏകദേശം ആറ് മാസത്തോളം പഴക്കമുണ്ടെന്നാണ് പോലീസ് നൽകുന്ന സൂചന.
സംഭവവുമായി ബന്ധപ്പെട്ട് ദുരൂഹത വർധിച്ചതോടെ, കാണാതായ വയോധികയുടെ ഭർത്താവിനെ തലശ്ശേരി പോലീസ് കസ്റ്റഡിയിലെടുത്തു. ഇയാളെ പോലീസ് ചോദ്യം ചെയ്തുവരികയാണ്. കൊലപാതക സാധ്യത ഉൾപ്പെടെയുള്ള കാര്യങ്ങൾ പോലീസ് അന്വേഷണ പരിധിയിൽ ഉൾപ്പെടുത്തിയിട്ടുണ്ട്. മൃതദേഹം തിരിച്ചറിയുന്നതിനും മരണകാരണം ഉറപ്പിക്കുന്നതിനുമായി കൂടുതൽ ശാസ്ത്രീയ പരിശോധനകൾ ഉടൻ നടത്തുമെന്നും പോലീസ് അറിയിച്ചു.
