ലഖ്നൗ: ആഗോള വെല്ലുവിളികള്ക്കിടയില് ഭാരതത്തിന്റെ പരമ്പരാഗത സന്ദേശമായ വസുധൈവ കുടുംബം കൂടുതല് പ്രാധാന്യം അര്ഹിക്കുന്നുണ്ടെന്ന് രാഷ്ട്രപതി ദ്രൗപദി മുര്മു. ലഖ്നൗവില് ബ്രഹ്മ കുമാരീസിന്റെ വാര്ഷിക ചടങ്ങുകളുടെ ഉദ്ഘാടനം നിര്വഹിച്ചു സംസാരിക്കുകയായിരുന്നു രാഷ്ട്രപതി. ആഗോള ഐക്യത്തിനും വിശ്വാസത്തിനും വേണ്ടിയുള്ള ധ്യാനം എന്ന പ്രമേയത്തിലൂന്നി ഒരു വര്ഷത്തെ വാര്ഷിക ചടങ്ങുകളാണ് ബ്രഹ്മ കുമാരീസ് സംഘടിപ്പിച്ചിട്ടുള്ളത്.
സാങ്കേതിക വിദ്യ, നിര്മിതബുദ്ധി, ഡിജിറ്റല് പരിവര്ത്തനം ബഹിരാകാശ പര്യവേഷണം എന്നീ മേഖലകളില് മനുഷ്യന് ഇന്ന് അതിവേഗത്തില് വളര്ച്ച കൈവരിക്കുന്നുണ്ട്. എന്നാല് വൈകാരികവും സാമൂഹികവുമായ ക്ഷേമപ്രവര്ത്തനങ്ങള് കുറഞ്ഞുവരികയാണ്. യഥാര്ത്ഥ സമാധാനവും സന്തോഷവും ബാഹ്യ വസ്തുക്കളിലല്ല, നമുക്കുള്ളില് തന്നെയാണെന്ന് മനസിലാക്കണം.
ലോകസമാധാനം, മാനുഷിക മൂല്യങ്ങള്, സ്ത്രീ ശാക്തീകരണം, ആത്മീയ ഉണര്വ്, വിദ്യാഭ്യാസം, ധ്യാനം എന്നീ മേഖലകളില് ബ്രഹ്മ കുമാരിമാരുടെ ശ്രമങ്ങള് പ്രചോദനം നല്കുന്നവയാണെന്നും രാഷ്ട്രപതി പ്രശംസിച്ചു. മെച്ചപ്പെട്ടതും സമാധാനപരവും വിശ്വസനീയവുമായ ലോകം കെട്ടിപ്പടുക്കുന്നതില് ബ്രഹ്മ കുമാരീസിലെ എല്ലാ സഹോദരി സഹോദരന്മാരും തുടര്ന്നും ഒരു പ്രധാന പങ്ക് വഹിക്കുമെന്നും രാഷ്ട്രപതി പ്രത്യാശ പ്രകടിപ്പിച്ചു.
മനസാണ് ബന്ധനത്തിന്റെയും മോചനത്തിന്റെയും ഉറവിടം എന്ന് ഭാരതത്തിന്റെ പുരാതന പാരമ്പര്യം വിശ്വസിക്കുന്നുവെന്ന് ഉത്തര്പ്രദേശ് മുഖ്യമന്ത്രി യോഗി ആദിത്യനാഥ് പറഞ്ഞു. ലോകമെമ്പാടുമുള്ള ഭീകരത, അസ്വസ്ഥതകള്, അശാന്തി എന്നിവ അനിയന്ത്രിതമായ മാനസിക പ്രവണതകളില് വേരൂന്നിയതാണ്.
അത്തരം വിനാശകരമായ പ്രവണതകളെ ഭീകരതയായാണ് ഭാരതം വ്യാഖ്യാനിക്കുന്നത്. രാജ്യം ഇതിനെതിരെ ഭൗതികമായും ആത്മീയമായുമുള്ള പോരാട്ടം തുടരുകയാണ്, യോഗി ആദിത്യനാഥ് കൂട്ടിച്ചേര്ത്തു. ഗവര്ണര് ആനന്ദി ബെന് പട്ടേല് ചടങ്ങില് പങ്കെടുത്തു.
