കോഴിക്കോട്: ഹീനവും അതീവഗുരുതരവുമായ കുറ്റകൃത്യം ചെയ്ത രാഹുല്‍ മാങ്കൂട്ടത്തിലിനെ അറസ്റ്റു ചെയ്യണമെന്നും രാഹുല്‍ എംഎല്‍എ സ്ഥാനം രാജിവെക്കണമെന്നും ബിജെപി മുന്‍ സംസ്ഥാന അധ്യക്ഷന്‍ കെ. സുരേന്ദ്രന്‍.
കോഴിക്കോട്ട് മാധ്യമങ്ങളോട് സംസാരിക്കുകയായിരുന്നു അദ്ദേഹം. ഒരു നിമിഷം പോലും എംഎല്‍എ ആയി തുടരാന്‍ രാഹുലിന് അര്‍ഹതയില്ല. ഗര്‍ഭചിദ്രത്തിന് നിര്‍ബന്ധിക്കുന്നതടക്കമുള്ള നിരവധി കുറ്റകൃത്യങ്ങളുടെ തെളിവുകളടക്കം മുഖ്യമന്ത്രിക്ക് പരാതി ലഭിച്ചിരിക്കുന്നു. ഇതുവരെ ഇരയുടെ പരാതിയില്ലെന്നായിരുന്നു പറഞ്ഞിരുന്നത്. മുഖ്യമന്ത്രിക്ക് തന്നെ നേരിട്ട് പരാതി ലഭിച്ചത് പ്രശ്‌നത്തിന്റെ ഗൗരവം വര്‍ദ്ധിപ്പിക്കുന്നു. നിരവധി പെണ്‍കുട്ടികളെ മ്ലേച്ഛമായ രീതിയില്‍ പീഡിപ്പിച്ചിട്ടുണ്ട്. പലകാരണങ്ങള്‍ കൊണ്ടും പേര് പുറത്തുപറയാന്‍ കഴിയാത്ത പെണ്‍കുട്ടികള്‍ക്ക് പരാതിയുണ്ടെന്ന് ആഭ്യന്തരവകുപ്പിനറിയാം. എല്ലാ കേസുകളും വി.ഡി. സതീശനുമായി ചേര്‍ന്ന് ഒത്തുതീര്‍പ്പാക്കുന്ന മുഖ്യമന്ത്രി പിണറായി വിജയന്‍ ഈ കേസെങ്കിലും ഒത്തുതീര്‍പ്പാക്കരുതെന്നാണ് കേരളം ആഗ്രഹിക്കുന്നത്.
രാഹുല്‍മാങ്കൂട്ടത്തില്‍ പീഡിപ്പിച്ച നിരവധി പെണ്‍കുട്ടികളെകുറിച്ചുള്ള വിവരം വി.ഡി. സതീശനുമറിയാം. സതീശനും സണ്ണിജോസഫിനും തെല്ലെങ്കിലും മാന്യതയുണ്ടെങ്കില്‍ രാഹുലിനെകൊണ്ട് രാജിവെപ്പിക്കണം. വ്യക്തമായ തെളിവുകളോടെയുള്ള പരാതിയാണ് മുഖ്യമന്ത്രിക്ക് ലഭിച്ചിരിക്കുന്നത്. പാര്‍ലമെന്ററി പാര്‍ട്ടിയില്‍ നിന്നും കോണ്‍ഗ്രസില്‍ നിന്നും മാറ്റിനിര്‍ത്തിയാല്‍ തീരാവുന്ന പ്രശ്‌നമല്ലിത്. പുറത്താക്കിയ രാഹുല്‍ കോണ്‍ഗ്രസിനുവേണ്ടി തെരഞ്ഞെടുപ്പില്‍ വോട്ടുചോദിക്കുന്നു. കോണ്‍ഗ്രസില്‍ നിന്ന് പുറത്താക്കിയോ അകത്താക്കിയോ എന്നത് അവരുടെ ആഭ്യന്തര പ്രശ്‌നം മാത്രമാണ്.
രാഹുലിനെ എംഎല്‍എ സ്ഥാനത്ത് നിന്ന് മാറ്റേണ്ടത് നീതിബോധത്തിന്റെയും നിയമത്തിന്റെയും പ്രശ്‌നമാണ്. അല്പമെങ്കിലും ആത്മാര്‍ത്ഥതയുണ്ടെങ്കില്‍ സണ്ണി ജോസഫും സതീശനും മനോനില തെറ്റിയ കുറ്റവാളിയായ രാഹുലിനെ പുറത്താക്കാന്‍ തയാറാകണം അദ്ദേഹം പറഞ്ഞു.
