കണ്ണൂര്‍: ശബരിമല സ്വര്‍ണക്കൊള്ളയില്‍ അന്വേഷണം വൈകാതെ മുഖ്യമന്ത്രിയുടെ വാതില്‍പ്പടിയിലെത്തുമെന്ന് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍. കണ്ണൂരില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം. മുഖ്യമന്ത്രി തുടക്കം മുതല്‍ തന്നെ വീഴ്ചയാണെന്ന് പറഞ്ഞിട്ടുണ്ട്. കേരളത്തിലെ ആഭ്യന്തരവകുപ്പ് കൈയാളുന്നത് മുഖ്യമന്ത്രിയാണ്. കേരള പോലീസ് റിപ്പോര്‍ട്ട് ചെയ്യുന്നത് ആഭ്യന്തര മന്ത്രി കൂടിയായ മുഖ്യമന്ത്രി പിണറായി വിജയനാണ്. അതുകൊണ്ട് തന്നെ മുഖ്യമന്ത്രിയെ ചോദ്യം ചെയ്യാന്‍ പോലീസിന് പറ്റില്ല. അതുകൊണ്ടാണ് ബിജെപി കേന്ദ്ര ഏജന്‍സി അന്വേഷിക്കണമെന്നാവശ്യപ്പെടുന്നത്.
ഒരു ഈച്ചപോലും പിണറായി അറിയാതെ അങ്ങോട്ട് പോ
കില്ല. സ്വര്‍ണക്കൊള്ള മുഖ്യമന്ത്രിയും ദേവസ്വം മന്ത്രിയും അറിയില്ല എന്ന് പറഞ്ഞാല്‍ അതൊന്നും ആരും വിശ്വസിക്കില്ല. ഒരു പോറ്റിയെ ജയിലിലയച്ച് ബാക്കിയുള്ളവരെ സംരക്ഷിക്കുകയായിരുന്നു മുഖ്യമന്ത്രിയുടെ ലക്ഷ്യം. സ്വര്‍ണക്കൊള്ളയ്‌ക്ക് പിന്നില്‍ ഒരു മന്ത്രിയുണ്ടായിരുന്നു. മുഖ്യമന്ത്രിയുണ്ടായിരുന്നോ എന്ന കാര്യത്തില്‍ അന്വേഷണം നടക്കണം.
സംഭവത്തില്‍ നിന്ന് ശ്രദ്ധതിരിക്കാന്‍ സര്‍ക്കാര്‍ വിവിധകാര്യങ്ങള്‍ ചെയ്യുന്നുണ്ട്. കോടിക്കണക്കിന് വിശ്വാസികളെത്തുന്ന ശബരിമലയില്‍ നിന്ന് നാലരക്കിലോ സ്വര്‍ണം മോഷിച്ചുവെന്ന് പറഞ്ഞാല്‍ അത് കേവലം വീഴ്ചയല്ല മറിച്ച് കൊള്ളയാണ്. ശബരിമലയില്‍ സംഭവിച്ചതുപോലുള്ള കാര്യങ്ങള്‍ ഒരു ആരാധനാലയത്തിലും ഇനി നടക്കാന്‍ പാടില്ല. അതുകൊണ്ടാണ് ബിജെപി ശക്തമായി രംഗത്തുവരുന്നത്.
അമ്പലത്തില്‍ പോകുമ്പോള്‍ വിശ്വാസികളായിട്ടാണ് പോകേണ്ടത്. അല്ലാതെ കൊള്ളക്കാരായിട്ടല്ല. പത്മകുമാറിനെതിരെ സിപിഎം നടപടി സ്വീകരിക്കാത്തത് സ്വര്‍ണക്കൊള്ളയ്‌ക്ക് പിന്നില്‍ അദ്ദേഹം തനിച്ചല്ലാത്തതുകൊണ്ടാണ്. പിന്നില്‍ ആരൊക്കെയുണ്ടെന്ന് പത്മകുമാര്‍ പറയുമെന്ന ഭയം സിപിഎം നേതൃത്വത്തിനുണ്ട്. എങ്ങിനെയെങ്കിലും ഒളിച്ചുവെക്കാനാണ് സിപിഎം ശ്രമിക്കുന്നത്. എന്നാല്‍ ജനങ്ങള്‍ ഇവരെ വെറുതേ വിടാന്‍ പോകുന്നില്ലെന്നും രാജീവ് ചന്ദ്രശേഖര്‍ പറഞ്ഞു.
