പാലക്കാട്: രാഷ്‌ട്രീയ കേരളം ഉറ്റുനോക്കുന്ന പോരാട്ടമാണ് പാലക്കാട് നഗരസഭയില്‍. ബിജെപി സംസ്ഥാനത്ത് ആദ്യമായി അധികാരത്തിലെത്തിയ നഗരസഭയില്‍ സമാനകതകളില്ലാത്ത വികസനപ്രവര്‍ത്തനങ്ങളാണ് നടത്തിയത്. അതിനാല്‍ തന്നെ ഇതിന്റെ തുടര്‍ച്ചയ്‌ക്ക് ഹാട്രിക് വിജയമാണ് ബിജെപിയുടെ ലക്ഷ്യം.
52 വാര്‍ഡുകളാണുണ്ടായിരുന്നതെങ്കില്‍ ഇത്തവണ വിഭജനത്തെ തുടര്‍ന്ന് 53ആയി. മുഴുവന്‍ വാര്‍ഡുകളിലും സ്ഥാനാര്‍ത്ഥികളെ നിര്‍ത്തിക്കൊണ്ടാണ് എന്‍ഡിഎ അധികാര തുടര്‍ച്ചക്കുള്ള പോരാട്ടവുമായി രംഗത്തുള്ളത്.
2015ല്‍ 24 സീറ്റുകള്‍ നേടി സംസ്ഥാനത്ത് ബിജെപി ഭരിക്കുന്ന ആദ്യ നഗരസഭയായി പാലക്കാട് ചരിത്രത്തിലിടം നേടി. 2020ല്‍ 28 സീറ്റുകള്‍ നേടി ഒറ്റകക്ഷിയായി ഭരണം തുടര്‍ന്നു. 2010ല്‍ 14 സീറ്റുകളാണ് ബിജെപിക്കുണ്ടായിരുന്നത്. ബിജെപി ഭരിക്കുന്ന പാലക്കാട് നഗരസഭയുടെ വികസനത്തിനായി കേന്ദ്രസര്‍ക്കാര്‍ 400 കോടിയോളം രൂപയാണ് കഴിഞ്ഞ പത്തുവര്‍ഷത്തിനിടെ അനുവദിച്ചത്. ബിജെപി ഭരണസമിതി കൊണ്ടുവന്ന വികസന പ്രവര്‍ത്തനങ്ങള്‍ ഇന്ന് സംസ്ഥാനത്തിനു തന്നെ മാതൃകയാണ്.
110 കോടിരൂപ ജല്‍ജീവന്‍ പദ്ധതിക്കുമാത്രം വിനിയോഗിച്ചു. 99ശതമാനം വീടുകളിലും കുടിവെള്ളമെത്തിക്കാന്‍ കഴിഞ്ഞു എന്നതാണ് നേട്ടം. ചെറുതും വലുതുമായ റോഡുകള്‍ ബിഎംബിസി നിലവാരത്തിലേക്ക് ഉയര്‍ത്തി, ആരോഗ്യവിഭാഗത്തില്‍ രാജ്യത്തില്‍ 3800-ാം സ്ഥാനത്തുണ്ടായിരുന്ന പാലക്കാട് ഇന്ന് 380-ലേക്ക് എത്തി. മാലിന്യ സംസ്‌കരണ പ്രവര്‍ത്തനങ്ങളിലും കേരളത്തിന് മാതൃകയാണ് പാലക്കാട്.
ദക്ഷിണേന്ത്യയിലെ ആദ്യത്തെ ക്യാമറ നഗരമായി പാലക്കാട് ഉയര്‍ന്നു. ആയുഷ്മാന്‍ ഭാരത് പദ്ധതിയില്‍ ഉള്‍പ്പെടുത്തി ഒമ്പത് നഗരാരോഗ്യ ചികിത്സ കേന്ദ്രങ്ങള്‍, നഗരത്തിലെ മുഴുവന്‍ സ്ഥാപനങ്ങളെയും ജിഐഎസ് മാപ്പിങില്‍ ഉള്‍പ്പെടുത്തി. പച്ചക്കറി മാര്‍ക്കറ്റ്(വലിയങ്ങാടി) ആധുനിക നിലവാരത്തിലേക്ക് മാറ്റുന്നതിന് കേന്ദ്ര സര്‍ക്കാരിന്റെ പ്രത്യേക വികസന പദ്ധതിയായ എസ്എഎസ്സില്‍ ഉള്‍പ്പെടുത്തി 140 കോടി രൂപയുടെ ബൃഹദ് പദ്ധതിക്കാണ് അംഗീകാരം ലഭിച്ചു. 3.72കോടിരൂപ ചിലവില്‍സ്വന്തമായ ശുചിമുറി മാലിന്യ സംസ്‌കരണ പ്ലാന്റ്.നാപ്കിന്‍, ഡയപ്പര്‍ സംസ്‌കരണത്തിന് ഇന്‍സിനേറ്റര്‍ സ്ഥാപിച്ച കേരളത്തിലെ ആദ്യ നഗരസഭ തുടങ്ങി എടുത്തുപറയേണ്ട നിരവധി പദ്ധതികളാണ് നഗരസഭയില്‍ നടപ്പിലാക്കിയത്.
2020ല്‍ 50 വാര്‍ഡുകളില്‍ മാത്രമാണ് ബിജെപി ഭരിച്ചതെങ്കില്‍ ഇത്തവണ മുഴുവന്‍ വാര്‍ഡുകളിലും എന്‍ഡിഎ സ്ഥാനാര്‍ത്ഥികള്‍ മത്സരരംഗത്തുണ്ട്. 51 വാര്‍ഡുകളില്‍ ബിജെപിയും രണ്ടുവാര്‍ഡുകളില്‍ ബിഡിജെഎസുമാണ് മത്സരിക്കുന്നത്. മുന്‍ കൗണ്‍സിലര്‍മാരും, നിലവിലെ കൗണ്‍സിലര്‍മാരും, ബിരുദ-ബിരുദാനന്തരദാരികള്‍, അധ്യാപകര്‍, പ്രൊഫസര്‍മാര്‍, ഡോക്ടറേറ്റ് നേടിയവര്‍, വ്യാപാരികള്‍, പൗരപ്രമുഖര്‍ എന്നിവരാണ് പൊതുസമൂഹത്തിന്റെ പരിച്ഛേദമായി മത്സരംഗത്തുള്ളത്. നിലവില്‍ പാലക്കാട് നഗരസഭ വൈസ് ചെയര്‍മാനും ബിജെപി സംസ്ഥാന ട്രഷററുമായ അഡ്വ.ഇ.കൃഷ്ണദാസ് തന്റെ രണ്ടാം അംഗത്തിന് രംഗത്തുണ്ട്. ബിജെപി ഈസ്റ്റ് ജില്ലാ ജനറല്‍സെക്രട്ടറിയും നഗരസഭ ആരോഗ്യ സ്റ്റാന്റിങ് കമ്മിറ്റി ചെയര്‍മാനുമായ പി. സ്മിതേഷ് പുതിയ വാര്‍ഡായ മുരുകണിയിലാണ് തന്റെ നാലാം മത്സരത്തിനിറങ്ങിയിട്ടുള്ളത്. വികസനപ്രവര്‍ത്തനങ്ങള്‍ ഉയര്‍ത്തിക്കാട്ടിയാണ് ബിജെപി പ്രചാരണത്തിലുള്ളത്.
അതേസമയം, വര്‍ഷങ്ങളോളം പാലക്കാട് നഗരസഭ ഭരിച്ച എല്‍ഡിഎഫിന് ഇത്തവണ മുഴുവന്‍ വാര്‍ഡുകളിലും സ്ഥാനാര്‍ത്ഥികളെ നിര്‍ത്താന്‍ കഴിഞ്ഞിട്ടില്ല. 50, 51 വാര്‍ഡുകളിലെ സ്ഥാനാര്‍ത്ഥികളുടെ നാമനിര്‍ദ്ദേശ പത്രിക തള്ളുകയായിരുന്നു. അതേസമയം യുഡിഎഫില്‍ വിമതശല്യം രൂക്ഷമാണ്. സിറ്റിങ് വാര്‍ഡുകളില്‍ ഉള്‍പ്പെടെ അഞ്ച് വിമതന്മാരാണ് ഔദ്യോഗിക സ്ഥാനാര്‍ത്ഥികള്‍ക്കെതിരെ മത്സരിക്കുന്നത്.
