ന്യൂദൽഹി: മുൻ പ്രധാനമന്ത്രി ഷെയ്ഖ് ഹസീനയെ കൈമാറണമെന്ന ബംഗ്ലാദേശിന്റെ അഭ്യർത്ഥനയ്ക്ക് ഇന്ത്യ മറുപടി നൽകി. ഷെയ്ഖ് ഹസീനയെ കൈമാറണമെന്ന ബംഗ്ലാദേശിന്റെ അഭ്യർത്ഥന ഇന്ത്യ പരിശോധിച്ചുവരികയാണെന്ന് വിദേശകാര്യ മന്ത്രാലയം അറിയിച്ചു. വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ ആണ് ഇക്കാര്യം വ്യക്തമാക്കിയത്.
“ഞങ്ങൾക്ക് ആ അഭ്യർത്ഥന ലഭിച്ചു, അഭ്യർത്ഥന പരിശോധിച്ചുകൊണ്ടിരിക്കുകയാണ്. ബംഗ്ലാദേശിലെ ജനങ്ങളോട് ഞങ്ങൾ പ്രതിജ്ഞാബദ്ധരാണ്. ഈ വിഷയത്തിൽ എല്ലാ പങ്കാളികളുമായും ഞങ്ങൾ ക്രിയാത്മകമായി ഇടപഴകുന്നത് തുടരും.” – അദ്ദേഹം എക്സിൽ കുറിച്ചു.
കഴിഞ്ഞ വർഷം ജൂലൈയിൽ നടന്ന കലാപത്തിനിടെ മനുഷ്യരാശിക്കെതിരായ കുറ്റകൃത്യങ്ങൾക്ക് ഈ മാസം ആദ്യം ഹസീനയ്‌ക്ക് വധശിക്ഷ വിധിച്ചിരുന്നു. വിധി പ്രകാരം കഴിഞ്ഞ വർഷം ഓഗസ്റ്റ് 5 ന് ധാക്കയിലെ ചങ്കർപുളിൽ നിരായുധരായ ആറ് പ്രതിഷേധക്കാരെ വെടിവച്ചു കൊന്നതിന് 78 കാരിയായ പുറത്താക്കപ്പെട്ട നേതാവിന് വധശിക്ഷ വിധിച്ചത്.
ശിക്ഷ വിധിച്ചതിനെത്തുടർന്ന് പുറത്താക്കപ്പെട്ട പ്രധാനമന്ത്രി ഷെയ്ഖ് ഹസീനയെയും മുൻ ആഭ്യന്തരമന്ത്രി അസദുസ്സമാൻ ഖാൻ കമാലിനെയും ഉടൻ കൈമാറണമെന്ന് ബംഗ്ലാദേശ് ഇടക്കാല സർക്കാർ ഇന്ത്യയോട് ആവശ്യപ്പെട്ടു. എന്നാൽ ഇതുവരെ ഇന്ത്യ ഇതിനോട് പ്രതികരിച്ചിരുന്നില്ല. കഴിഞ്ഞ വർഷം ഓഗസ്റ്റ് 5 ന് വ്യാപകമായ പ്രതിഷേധങ്ങളെത്തുടർന്ന് ബംഗ്ലാദേശിൽ നിന്ന് പലായനം ചെയ്തതിനുശേഷം ഹസീന ഇന്ത്യയിൽ തന്നെയാണ് താമസിക്കുന്നത്. ഖാനും ഇന്ത്യയിലുണ്ടെന്ന് കരുതപ്പെടുന്നു.
