നെയ്യാറ്റിന്‍കര: തദ്ദേശ തെരഞ്ഞെടുപ്പ് നടക്കുന്നത് കേരളത്തിലാണെങ്കിലും മത്സരം കൊഴുപ്പിക്കാന്‍ തമിഴ്‌നാടും അരയുംതലയും മുറുക്കി ഇറങ്ങുകയാണ്. കേരളത്തില്‍ ഏറ്റവും കൂടുതല്‍ സ്ഥാനാര്‍ത്ഥികള്‍ മത്സര രംഗത്തുള്ള പൊതുതെരഞ്ഞെടുപ്പാണ് തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ്. 941 ഗ്രാമപഞ്ചായത്തുകള്‍, 152 ബ്ലോക്ക് പഞ്ചായത്തുകള്‍, 14 ജില്ലാ പഞ്ചായത്തുകള്‍ എന്ന ത്രിതല പഞ്ചായത്ത് സംവിധാനത്തിലേക്കും, നഗരസഭകള്‍, കോര്‍പ്പറേഷനുകള്‍ എന്നിവിടങ്ങളിലേക്കും ഓരോ അഞ്ചുവര്‍ഷം കൂടുമ്പോഴും എത്തുന്നത് കാല്‍ ലക്ഷത്തോളം സ്ഥാനാര്‍ത്ഥികള്‍.
നിയമസഭയിലേക്കും ലോകസഭയിലേക്കുമുള്ള തെരഞ്ഞെടുപ്പുകളെ അപേക്ഷിച്ച് ആവേശവും വാശിയും വര്‍ധിച്ച തെരഞ്ഞെടുപ്പാണ് തദ്ദേശസ്ഥാപനങ്ങളിലേക്കു നടക്കുന്നത്. ഓരോ സ്ഥാനാര്‍ത്ഥിയും തങ്ങളുടെ പ്രചാരണം കൊഴുപ്പിക്കാനായി ചുവരെഴുത്തും പോസ്റ്ററുകളും ലഘുലേഖകളും അനൗണ്‍സ്‌മെന്റ് വാഹനങ്ങളും ഒരുക്കുന്നതിലും പരസ്പരം മത്സരിക്കും. കേരളത്തില്‍ തെരഞ്ഞെടുപ്പ് അടുക്കുമ്പോള്‍ തമിഴ്‌നാട്ടിലെ ശിവകാശിയിലെ പ്രസ്സുകള്‍ രാപ്പകലില്ലാതെ പ്രവര്‍ത്തിക്കുന്നു. സ്ഥാനാര്‍ത്ഥികളുടെ പുഞ്ചിരിയും തൊഴുകൈയും വര്‍ണ്ണശബളമായ പോസ്റ്ററുകളാക്കാന്‍ ഇവിടെ തിരക്കാണ്.
അനൗണ്‍സ്‌മെന്റ് വാഹനങ്ങള്‍ക്കുള്ള മൈക്ക് സെറ്റും ജനറേറ്ററും എത്തുന്നതും തമിഴ്നാട്ടില് നിന്നു തന്നെ. കേരളത്തില്‍ ഇത്രയും സ്ഥാനാര്‍ത്ഥികള്‍ക്ക് ഒരേസമയം ഉപയോഗിക്കാനുള്ള മൈക്ക് സെറ്റ് ലഭ്യമല്ലാതാവുമ്പോഴാണ് ഓപ്പറേറ്റര്‍മാര്‍ തമിഴ്‌നാടിനെ ആശ്രയിക്കുന്നത്. പ്രധാന താരം ജനറേറ്ററാണ്. ഒരു മൈക്ക്‌സെറ്റ് ഓപ്പറേറ്റര്‍ക്ക് തന്നെ ശരാശരി ഇരുപത്തിയഞ്ച് ജനറേറ്റര്‍ വേണ്ടിവരും. ചിലര്‍ ആയിരക്കണക്കിന് ജനറേറ്റര്‍ തമിഴ്നാട്ടില് നിന്ന് എത്തിച്ച് ഉയര്‍ന്ന വാടകയ്‌ക്ക് നല്‍കി കീശ വീര്‍പ്പിക്കുന്ന രീതിയും നിലവിലുണ്ട്. ഇതിനകം കോയമ്പത്തൂര്‍ വരെയുള്ള ഓപ്പറേറ്റര്‍മാരില്‍ നിന്ന് ജനറേറ്ററും മൈക്ക്‌സെറ്റും ബുക്ക് ചെയ്തുകഴിഞ്ഞു.
കേരളത്തിലെ ഉത്സവകാലം കഴിഞ്ഞാല്‍ വരുമാനമുള്ള സീസണാണ് തെരഞ്ഞെടുപ്പ്കാലം. എന്നാല്‍ ഇത്തവണത്തെ പെരുമാറ്റ ചട്ടങ്ങളില്‍ ചിലത് തങ്ങളെ ബാധിച്ചെന്ന് മൈക്ക്‌സെറ്റ് ഓപ്പറേറ്റര്‍മാര്‍ പറയുന്നു. അതില്‍ പ്രധാനം തെരഞ്ഞെടുപ്പിന്റെ അവസാന മൂന്നു ദിവസം മാത്രമേ ഉച്ചഭാഷിണി ഉപയോഗിക്കാവൂ എന്നുള്ളതാണ്. ശബ്ദം 25 ഡെസിബലില്‍ താഴെ ആവണം, കമ്മീഷന്‍ സമയപരിധിയും നിശ്ചയിച്ചിട്ടുണ്ട്. ഇവയോട് ഏറെക്കുറെ യോജിപ്പാണെങ്കിലും വലിയ തുകയ്‌ക്ക് ഉപകരണങ്ങള്‍ വാങ്ങി വല്ലപ്പോഴും തരപ്പെടുന്ന മൈക്ക്‌സെറ്റ് ഉപയോഗത്തിലൂടെ കിട്ടുന്ന തുച്ഛവരുമാനത്തിലൂടെയാണ് കേരളത്തിലെ മൈക്ക്‌സെറ്റ് ഓപ്പറേറ്റര്‍മാരുടെ വീട്ടിലെ അടുപ്പ് പുകയുന്നത്.
ജന്മഭൂമി ഓണ്‍ലൈന്‍