ന്യൂദല്‍ഹി: ബീഹാറില്‍ നാണം കെട്ട തോല്‍വി ഉണ്ടായിട്ടും പാര്‍ട്ടിയെ കെട്ടിപ്പടുക്കാനല്ല സ്വന്തം കാര്യങ്ങള്‍ നേടിയെടുക്കുന്നതിലാണ് കോണ്‍ഗ്രസിലെ ആളുകള്‍ക്ക് താല്‍പര്യമെന്ന് കോണ്‍ഗ്രസിലെ പഴയ ട്രഷററായിരുന്ന അന്തരിച്ച അഹമ്മദ് പട്ടേലിന്റെ മകള്‍. കോണ്‍ഗ്രസ് തന്‍കാര്യം നോക്കികളുടെ പാര്‍ട്ടിയായി മാറിയെന്നും അഹമ്മദ് പട്ടേലിന്റെ മകള്‍ മുംതാസ് പട്ടേല്‍ പറഞ്ഞു.
ബീഹാറില്‍ തോറ്റെങ്കിലും കോണ്‍ഗ്രസ് നേതാക്കള്‍ ഇപ്പോള്‍ രാജ്യസഭാ സീറ്റുകളില്‍ കണ്ണുനട്ട് കരുക്കള്‍ നീക്കുകയാണ്. ഇതിനപ്പുറം അവര്‍ക്ക് പാര്‍ട്ടിയില്‍ യാതൊരു താല‍്പര്യവുമില്ലെന്നും മുംതാസ് പട്ടേല്‍ വ്യക്തമാക്കി. മോദി ശക്തനാണ്. മോദിയ്‌ക്കെതിരെ സംസാരിച്ചാല്‍ ജനങ്ങള്‍ കേള്‍ക്കില്ല എന്നതാണ് സ്ഥിതി.ജനങ്ങളുടെ വിശ്വാസം ആര്‍ജ്ജിക്കാനുള്ള പ്രവര്‍ത്തനങ്ങളാണ് ഇപ്പോള്‍ ആവശ്യം- മുംതാസ് പട്ടേല്‍ പറഞ്ഞു.
അതേ സമയം കോണ്‍ഗ്രസിലുള്ളവരുടെ അധികാരഭാവവും ഗര്‍വ്വും നന്നല്ലെന്ന് രാഹുല്‍ ഗാന്ധിയെ മനസ്സില്‍വെച്ചുകൊണ്ട് മുംതാസ് പട്ടേല്‍ പറഞ്ഞു. ജനങ്ങളുടെ വാക്കുകള്‍ക്ക് കാതോര്‍ക്കണം. എങ്കിലേ താഴെത്തട്ടില്‍ ആളുകള്‍ നമ്മള്‍ പറയുന്നത് കേള്‍ക്കൂ.- മുംതാസ് പട്ടേല്‍ ചൂണ്ടിക്കാട്ടുന്നു.
ഇപ്പോഴും കോണ്‍ഗ്രസിലെ ചെറിയ അധികാരമുള്ളവര്‍ വരെ മറ്റുള്ളവരെ സ്റ്റേജില്‍ നിന്നും തള്ളിത്താഴെയിടുന്ന സ്ഥിതയാണ് ഉള്ളത്. അങ്ങിനെയല്ല പ്രവര്‍ത്തകര്‍ വേണ്ടത്. അവര്‍ താഴെത്തട്ടില്‍ ഇറങ്ങിച്ചെന്ന് പ്രവര്‍ത്തിക്കുകയാണ് വേണ്ടത്. എന്റെ അച്ഛനെ നോക്കിയാല്‍ അദ്ദേഹം ഇരട്ടി കഠിനാധ്വാനം ചെയ്തിരുന്ന വ്യക്തിയാണ്. കോണ്‍ഗ്രസിലെ അധികാരകേന്ദ്രീകരണ രീതി മാറണം. എല്ലാവരും അവരവരുടെ അധികാരം സ്ഥാപിക്കാന്‍ ശ്രമിക്കുകയാണ്. മറ്റുള്ളവരെ തള്ളിത്താഴെയിടാന്‍ ശ്രമിക്കുകയാണ്. പുതിയ ഒരാളെ അവരുടെ സ്ഥാനത്തേക്ക് കടന്നുവരാന്‍ അവര്‍ അനുവദിക്കുന്നില്ല. – മുംതാസ് പട്ടേല്‍ പറഞ്ഞു.
