കോട്ടയം : പുതുപ്പള്ളി ഒരു നാട്ടുരാജ്യവും ചാണ്ടി ഉമ്മന്‍ അവിടത്തെ നാട്ടുരാജാവുമാണെന്ന് വിചാരിക്കരുത് : ഫേസ്ബുക്ക് പോസ്റ്റിലൂടെ ചാണ്ടി ഉമ്മന്‍ എം.എല്‍.എയ്ക്കെതിരെ ജില്ലാ പഞ്ചായത്ത് മെമ്പര്‍ റെജി എം. ഫിലിപ്പോസിന്‌റെ മുന്നറിയിപ്പ്. നിയോജകമണ്ഡലതല കോര്‍ കമ്മിറ്റിയിലേക്കോ, ഡി.സി.സി യിലേക്കോ ചര്‍ച്ച ചെയ്യാതെ ചാണ്ടി ഉമ്മന്‍ ഏകപക്ഷീയമായി സ്ഥാനാര്‍ത്ഥിയെ പ്രഖ്യാപിക്കുകയായിരുന്നുവെന്നാണ് ആക്‌ഷേപം. സ്വജന പക്ഷപാതവും വ്യക്തിതാല്പര്യങ്ങളും മൂലം ചാണ്ടി ഉമ്മന്‍ കാണിക്കുന്ന രാഷ്ര്ടീയ നെറികേടുകള്‍ക്ക് എതിരെ പൊതുജന പിന്തുണയോടെ പോരാടുമെന്നും റെജി ഫേസ് ബുക്ക് കുറിപ്പില്‍ പറയുന്നു.
സ്ഥാനാര്‍ത്ഥിത്വം നിഷേധിച്ചതിനെത്തുടര്‍ന്ന് പാമ്പാടി ബ്ലോക്ക് മണര്‍കാട് ഡിവിഷനില്‍ വിമത സ്ഥാനാര്‍ഥിയായി മത്സരിക്കുകയാണ് റെജി.
പാര്‍ട്ടിയിലെ ഒരു ചെറിയ പദവിയില്‍ നിന്നും മാറ്റിയപ്പോള്‍ ഉന്നത നേതാക്കള്‍ക്കെതിരെ വരെ പൊട്ടിത്തെറിച്ച ആളാണദ്ദേഹം. പുതുപ്പള്ളിയിലെ വീട്ടില്‍ ഇരുന്നാണ് എം എല്‍ എ സ്ഥാനാര്‍ത്ഥികളെ പ്രഖ്യാപിക്കുന്നത്. പുതുപ്പള്ളി ഒരു നാട്ടുരാജ്യവും ചാണ്ടി ഉമ്മന്‍ അവിടത്തെ നാട്ടുരാജാവുമാണെന്ന് വിചാരിക്കരുത്. ഒരവസരം വരുമ്പോള്‍ കറിവേപ്പിലപോലെ ചവറ്റുകൊട്ടയിലേക്ക് വലിച്ചെറിയുന്നത് ഉമ്മന്‍ ചാണ്ടിയുടെ രാഷ്‌ട്രീയമല്ലായിരുന്നു. ആ രാഷ്‌ട്രീയത്തിലേക്കു നടന്നടുക്കാന്‍ ചാണ്ടി ഉമ്മന്‍ എം.എല്‍.എ. ഒരുപാട് സഞ്ചരിക്കേണ്ടി വരുമെന്നും ഫേസ് ബുക്ക് കുറിപ്പില്‍ പറയുന്നു.
