പത്തനംതിട്ട: നടന് ജയറാമിനെ സാക്ഷിയായി സ്വര്ണക്കൊള്ള കേസില് പ്രത്യേക അന്വേഷണ സംഘം ഉള്പ്പെടുത്തി. സാക്ഷികളില് നിന്നു വിശദ വിവരങ്ങള് ശേഖരിക്കുന്നതിന്റെ ഭാഗമായി സാക്ഷി മൊഴി ശേഖരിക്കുന്നതിനു സൗകര്യമുള്ള ദിവസം മുന്കൂട്ടി അറിയിക്കണമെന്നും ആ തീയതിയിലും സമയത്തുമെത്തണമെന്നും കാട്ടി ജയറാമിന് എസ്ഐടി നോട്ടീസ് അയച്ചിട്ടുണ്ട്.
കേസില് കൂടുതല് സാക്ഷികളെ ചോദ്യം ചെയ്തു വരുന്നു. 2019ലും അതിനു ശേഷവും ദേവസ്വം ബോര്ഡ് അംഗങ്ങളായവരുടെ പേഴ്സണല് സ്റ്റാഫ്, പത്മകുമാറിന്റെ പ്രൈവറ്റ് സെക്രട്ടറി, അന്നത്തെ അസിസ്റ്റന്റ് എന്ജിനീയര് ശ്രീകുമാര്, ബോര്ഡ് അംഗം ശങ്കരദാസിന്റെ പ്രൈവറ്റ് സെക്രട്ടറിയും മരാമത്ത് മുന് ഓവര്സിയറുമായ സുനില്കുമാര് എന്നിവരെ ചോദ്യം ചെയ്തു കഴിഞ്ഞു.
കേസന്വേഷണം കൂടുതല് വേഗത്തിലാക്കാനാണ് എസ്ഐടി ഉദ്ദേശിക്കുന്നത്. ഇതുവരെ ആറ് അറസ്റ്റുകള് നടന്നുകഴിഞ്ഞു. ഒക്ടോബര് 16നാണ് ഒന്നാം പ്രതി ഉണ്ണികൃഷ്ണന് പോറ്റിയെ അറസ്റ്റുചെയ്തത്. 23ന് മുന് അഡ്മിനിസ്ട്രേറ്റീവ് ഓഫീസര് മുരാരി ബാബുവിനെയും നവംബര് ഒന്നിന് മുന് എക്സിക്യൂട്ടീവ് ഓഫീസര് ഡി. സുധീഷ് കുമാറിനെയും ആറിന് മുന് തിരുവാഭരണ കമ്മിഷണര് ബൈജുവിനെയും അറസ്റ്റുചെയ്തു. മുന് ദേവസ്വം കമ്മിഷണര് എന്. വാസുവിനെ 11നും ദേവസ്വം ബോര്ഡ് മുന് പ്രസിഡന്റ് എ. പത്മകുമാറിനെ 20നുമാണ് അറസ്റ്റു ചെയ്തത്. പ്രതിപ്പട്ടികയില് ശേഷിക്കുന്നവരെ ഈയാഴ്ച ചോദ്യം ചെയ്യാന് വിളിപ്പിക്കുമെന്ന് അറിയുന്നു.
