നാഗ്പുർ : ചരിത്ര പുസ്തകങ്ങളിൽ പ്രധാനപ്പെട്ടതും പോസിറ്റീവുമായ നിരവധി മാറ്റങ്ങൾ വരുത്തിയിട്ടുണ്ടെന്ന് വ്യക്തമാക്കി ആർ എസ് എസ് അഖില ഭാരതീയ പ്രചാർ പ്രമുഖ് സുനിൽ അംബേക്കർ. മഹാരാഷ്‌ട്രയിലെ നാഗ്പൂരിൽ ഓറഞ്ച് സിറ്റി സാഹിത്യോത്സവത്തിൽ പങ്കെടുത്ത് സംസാരിക്കുകയായിരുന്നു അദ്ദേഹം.
പുതിയ എൻ‌സി‌ആർ‌ടി പാഠപുസ്തകങ്ങളിൽ മുഗൾ ചക്രവർത്തി അക്ബറിനെയും മൈസൂർ ഭരണാധികാരിയായ ടിപ്പു സുൽത്താനെയും ഇനി മഹാന്മാരായി ചിത്രീകരിക്കുന്നില്ലെന്ന് അദ്ദേഹം വിശദീകരിച്ചു. “ചരിത്ര പുസ്തകങ്ങളിൽ നിരവധി പോസിറ്റീവായ മാറ്റങ്ങൾ ഞാൻ കണ്ടിട്ടുണ്ട്. ഈ പുസ്തകങ്ങളിൽ ഇനി ‘മഹാനായ അക്ബർ’ അല്ലെങ്കിൽ ‘മഹാനായ ടിപ്പു സുൽത്താൻ’ തുടങ്ങിയ പദങ്ങൾ ഉൾപ്പെടുത്തിയിട്ടില്ല. എന്നിരുന്നാലും പുതിയ തലമുറ അവരുടെ ക്രൂരമായ പ്രവൃത്തികളെക്കുറിച്ച് ബോധവാന്മാരായിരിക്കേണ്ടതിനാൽ ആരെയും നീക്കം ചെയ്തിട്ടില്ല. നമ്മുടെ കഷ്ടപ്പാടുകളുടെ കാരണങ്ങളും നമുക്ക് മോചനം ലഭിച്ച കാര്യങ്ങളും മനസ്സിലാക്കേണ്ടത് പ്രധാനമാണ്.” – അദ്ദേഹം തന്റെ പ്രസംഗത്തിൽ പറഞ്ഞു.
കൂടാതെ ഇത്തരം കാര്യങ്ങൾ വെളിച്ചത്തു കൊണ്ടുവരുന്നതിനോട് ചിലർക്ക് വിയോജിപ്പുണ്ടെങ്കിലും ചരിത്രത്തിന്റെ സത്യം പറയേണ്ടത് പ്രധാനമാണെന്ന് അദ്ദേഹം പറഞ്ഞു. അടുത്ത വർഷം മുതൽ 9, 10, 12 ക്ലാസുകളിലെ പാഠപുസ്തകങ്ങളിലും മാറ്റങ്ങൾ നടപ്പിലാക്കും. എൻസിഇആർടി ഈ സംരംഭം സ്വീകരിച്ചതിൽ വളരെ സന്തുഷ്ടനാണ്. പുതിയ തലമുറയ്‌ക്ക് ചരിത്രത്തെക്കുറിച്ചുള്ള ശരിയായ ധാരണ എത്തിക്കുന്നതിനുള്ള ഒരു വലിയ ചുവടുവയ്‌പ്പാണിത്. ഇന്ത്യ പുരാതനവും സമ്പന്നവുമായ അറിവിന്റെയും ധാരണയുടെയും പഠനത്തിന്റെയും ഒരു വലിയ ശേഖരം കൈവശം വച്ചിട്ടുണ്ടെന്നും അത് ജീവിതം മികച്ചതാക്കുമെന്നും അദ്ദേഹം തന്റെ പ്രസംഗത്തിൽ പറഞ്ഞു.
നളന്ദ സർവകലാശാലയെക്കുറിച്ച് പരാമർശിച്ച അദ്ദേഹം വേദങ്ങൾ, പുരാണങ്ങൾ, രാമായണം, മഹാഭാരതം എന്നിവ മാത്രമേ അവിടെ പഠിപ്പിച്ചിരുന്നുള്ളൂ എന്നാണ് ആളുകൾ പലപ്പോഴും കരുതുന്നതെന്ന് പറഞ്ഞു. എന്നാൽ നളന്ദയുടെ പാഠ്യപദ്ധതി പരിശോധിച്ചാൽ അവിടെ എത്രത്തോളം സമഗ്രമായ പഠനങ്ങൾ നടന്നിരുന്നുവെന്ന് ഒരാൾക്ക് മനസ്സിലാകുമെന്ന് അദ്ദേഹം പറഞ്ഞു. ലോകത്തിലെ ഏറ്റവും പഴക്കം ചെന്ന സർവകലാശാലകളിൽ ഒന്നാണിത്. സാഹിത്യത്തോടൊപ്പം 76 തരം നൈപുണ്യ അധിഷ്ഠിത കോഴ്‌സുകളും നളന്ദയിൽ പഠിപ്പിച്ചിരുന്നതായി അദ്ദേഹം വിശദീകരിച്ചു. ഇന്ന് ഇന്ത്യ പുരോഗമിക്കുകയാണെന്നും ഭാവിയിലെ ഇന്ത്യൻ സമൂഹം എങ്ങനെയായിരിക്കണമെന്ന് ചിന്തിക്കേണ്ട സമയമാണിതെന്നും അംബേക്കർ പറഞ്ഞു. പുരാതന അറിവും ശരിയായ ചരിത്രവും മനസ്സിലാക്കുന്നത് പുതിയ തലമുറയെ ശക്തിപ്പെടുത്തുമെന്നും അദ്ദേഹം കൂട്ടിച്ചേർത്തു.
