പനാജി: ചലച്ചിത്ര ജീവിതത്തിലെ രസാനുഭവങ്ങള്‍ പങ്കിട്ട് അഭിനേതാക്കളായ സുഹാസിനി മണിരത്‌നവും ഖുശ്ബു സുന്ദറും ഗോവ അന്താരാഷ്‌ട്ര ചലച്ചിത്രോത്സവത്തില്‍ ആസ്വാദക ഹൃദയം കീഴടക്കി. അഭിനയ ജീവിതത്തിന്റെ തുടക്ക കാലത്ത് തന്റെ അഭിനയവും നൃത്തവും കണ്ട് കമല്‍ഹാസന്റെ അനന്തരവള്‍ തന്നെയാണോ എന്ന് ചില സംവിധായകര്‍ പരിഹാസത്തോടെ ചോദിച്ചിട്ടുണ്ടെന്ന് സുഹാസിനി. അഭിനയത്തില്‍ പാരമ്പര്യം അവകാശപ്പെടുക എന്നത് ചിലപ്പോഴൊക്കെ ഒരു പ്രശ്‌നം ആയിരുന്നു എന്ന് ഈ അനുഭവം പങ്കുവച്ചുകൊണ്ട് അവര്‍ പറഞ്ഞു.
കെ.ജി. ജോര്‍ജ് സംവിധാനം ചെയ്ത ഇലവങ്കോട് ദേശത്തിന്റെ ചിത്രീകരണ വേളയില്‍, കഥാപാത്ര വേഷത്തില്‍ വന്ന മമ്മൂട്ടിയെ കണ്ട് സംഭാഷണം മറന്നു പോയ അനുഭവം ഖുശ്ബു പങ്കുവച്ചു. ചിന്നത്തമ്പി എന്ന ചിത്രത്തിന്റെ ക്ലൈമാക്‌സ് രംഗത്തില്‍ മതിമറന്ന് അഭിനയിക്കുന്നതിനിടയില്‍ ചില്ലുകള്‍ കൊണ്ട് ഇരു കൈകളും മുറിഞ്ഞതായും അവര്‍ പറഞ്ഞു. അഭിനയത്തില്‍ തെറ്റുകള്‍ തിരുത്താന്‍ സഹായിക്കുന്ന, അഭിനയത്തിലെ എന്‍സൈക്ലോപീഡിയ ആണ് കമല്‍ഹാസന്‍ എന്നും സംവിധായകന്റെ നടി ആണ് താന്‍ എന്ന് സുഹാസിനിയും അഭിപ്രായപ്പെട്ടു.
ചലച്ചിത്രോത്സവത്തിന്റെ ഭാഗമായി കല അക്കാദമിയില്‍ സംഘടിപ്പിച്ച അഭിനയ ശില്പ ശാലയില്‍ സംവദിക്കുകയായിരുന്നു ഇരുവരും. ചിന്നത്തമ്പിയിലെ നീ എങ്കെ എന്‍ അന്‍പേ എന്ന ഗാനത്തിനൊപ്പം ഖുശ്ബുവും കണ്ണകിയായി എത്തി സുഹാസിനിയും അഭിനയത്തിന്റെ രണ്ട് വ്യത്യസ്ത തലങ്ങള്‍ ആസ്വാദകര്‍ക്കായി അവതരിപ്പിച്ചു. കൊറിയോഗ്രാഫര്‍ കല മാസ്റ്ററും വേദിയിലെത്തി.
