നെയ്യാറ്റിന്‍കര: നഗരസഭയില്‍ ദമ്പതികള്‍ മത്സരിക്കുന്ന കൂട്ടപ്പന, ഗ്രാമം വാര്‍ഡുകള്‍ ശ്രദ്ധാകേന്ദ്രങ്ങളാകുന്നു. കഴിഞ്ഞ തവണ കൂട്ടപ്പന വാര്‍ഡില്‍ നിന്ന് എന്‍ഡിഎ സ്ഥാനാര്‍ത്ഥിയായി വിജയിച്ച് നഗരസഭയിലെത്തിയ നെയ്യാറ്റിന്‍കര റെയില്‍വേ സ്‌റ്റേഷന്‍ റോഡ് വന്ദനത്തില്‍ മഹേശ്വരന്‍ നായര്‍ എന്ന കൂട്ടപ്പന മഹേഷിന് ഇക്കുറി ഗ്രാമം കോണ്‍ഗ്രസില്‍ നിന്നു പിടിച്ചെടുക്കുക എന്നതാണ് നിയോഗം. ഭാര്യ സുപ്രിയ മഹേഷ് വാര്‍ഡില്‍ മഹേഷ് തുടങ്ങിവച്ച വികസനങ്ങള്‍ തുടരാന്‍ കൂട്ടപ്പനയില്‍ എന്‍ഡിഎ സ്ഥാനാര്‍ത്ഥിയായി മത്സരിക്കുന്നു.
സുപ്രിയക്കിത് കന്നിയങ്കമാണെങ്കിലും ഇരുത്തം വന്ന പൊതുപ്രവര്‍ത്തകയായി വാര്‍ഡിലെ വോട്ടര്‍മാര്‍ക്കിടയില്‍ സജീവമാണ്. കഴിഞ്ഞ തെരഞ്ഞെടുപ്പില്‍ കൂട്ടപ്പനയില്‍ പ്രചാരണം നിയന്ത്രിച്ചത് സുപ്രിയയാണ്. ഒപ്പം നഗരസഭയിലെ ഓരോ വിഷയവും സസൂക്ഷ്മം നിരീഷിച്ച് ഭര്‍ത്താവുമായും വാര്‍ഡിലെ പൊതുപ്രവര്‍ത്തകരുമായും ആശയങ്ങള്‍ പങ്കുവച്ച്, വാര്‍ഡില്‍ ഓരോ പ്രവര്‍ത്തനവും ആവിഷ്‌ക്കരിക്കുന്നതില്‍ ഭര്‍ത്താവിനെ സഹായിച്ച അനുഭവങ്ങള്‍ കരുത്തായി.
നാല്പത് വര്‍ഷമായി പട്ടയം ലഭിക്കാതെ ജീവിച്ച പവിത്രാനന്ദപുരം നഗറിലെ 32 കുടുംബങ്ങള്‍ക്ക് നിരവധി നിയമ പോരാട്ടങ്ങളും കടമ്പകളും കടന്ന് പട്ടയം നേടിക്കൊടുത്തത് മഹേഷിന് കൂട്ടപ്പന വാര്‍ഡില്‍ വന്‍ ജനകീയത നേടിക്കൊടുത്തു. വാര്‍ഡിലെ മുഴുവന്‍ റോഡുകളും ടാറും ഇന്റര്‍ലോക്കും ചെയ്തു. കൂട്ടപ്പന നൂറു ശതമാനം തെരുവ് വിളക്കുകള്‍ പ്രകാശിക്കുന്ന വാര്‍ഡാണ്. ജല അതോറിറ്റിയുടെ കുടിവെള്ളം മുട്ടിയാല്‍ അടിയന്തിരമായി വാട്ടര്‍ ടാങ്കുകളില്‍ വെള്ളമെത്തിച്ചതും, കോവിഡ് കാലത്തെ മികച്ച പ്രവര്‍ത്തനങ്ങളും മഹേഷിനെ വാര്‍ഡില്‍ ജനകീയനാക്കി.
വലിയ വികസന കാഴ്‌ച്ചപ്പാടാണ് ഗ്രാമം വാര്‍ഡിനെ കുറിച്ച് ഇരുവര്‍ക്കുമുള്ളത്. നെയ്യാറ്റിന്‍കര പട്ടണത്തോട് ചേര്‍ന്ന് കിടക്കുന്ന ഗ്രാമം വാര്‍ഡില്‍ വികസനം എത്തിനോക്കിയിട്ടില്ല. ചമ്പയില്‍, വിശ്വഭാരതി റോഡുകള്‍ മാതൃകാ റോഡുകളാക്കുക, വാര്‍ഡില്‍ വയോജന പാര്‍ക്ക് സ്ഥാപിക്കുക, ജല അതോറിറ്റിയുടെ ജലസംഭരണിയുടെ പണി പൂര്‍ത്തിയാക്കുക തുടങ്ങി വിവിധ വികസന പ്ലാനുകളുടെ പണിപ്പുരയിലുമാണ് മഹേഷ്. കൂട്ടപ്പന മഹേഷും ഭാര്യ സുപ്രിയാ മഹേഷും ഇതിനകം തന്നെ വിജയം ഉറപ്പിച്ചു കഴിഞ്ഞു. ഫോട്ടോഗ്രാഫറായ മഹേഷിന്റെ തൊഴിലിലെ സഹായി കൂടിയാണ് ഭാര്യ സുപ്രിയ. ബിടെക് പഠനം പൂര്‍ത്തിയാക്കിയ അഭിജിത്തും എംഎ വിദ്യാര്‍ത്ഥിനിയായ അഭേദ്യയുമാണ് മക്കള്‍.
