നെയ്യാറ്റിന്കര: നഗരസഭയില് സിപിഎമ്മിന് ഭീഷണി ഉയര്ത്തി റിബല് സ്ഥാനാര്ത്ഥികള് മത്സരരംഗത്ത്. നഗരസഭയിലെ ടൗണ്, ആലംപൊറ്റ, ഊരൂട്ടുകാല, അത്താഴമംഗലം എന്നീ വാര്ഡുകളില് റിബല് സ്ഥാനാര്ത്ഥികള് പ്രചാരണം ആരംഭിച്ചു.
ടൗണ് വാര്ഡില് നാലാംവട്ടവും മത്സരിക്കുന്ന അലി ഫാത്തിമയുടെ സ്ഥാനാര്ത്ഥിത്വത്തില് സിപിഎം ബ്രാഞ്ച് കമ്മറ്റി രാജിഭീഷണി വരെ മുഴക്കിയെങ്കിലും നേതൃത്വം വഴങ്ങിയില്ല. സാമുദായിക പ്രീണനം ലക്ഷ്യംവച്ചുള്ള നേതൃത്വത്തിന്റെ തീരുമാനത്തില് പ്രതിഷേധിച്ച് ഒരു വിഭാഗം മാറിനില്ക്കുകയും റിബല് സ്ഥാനാര്ത്ഥിയായി സിപിഎം ബ്രാഞ്ച് സെക്രട്ടറി രതീഷ്കുമാര് (ഭാസി) വാര്ഡില് പ്രചാരണം ആരംഭിക്കുകയും ചെയ്തു. നിലവില് കവളാകുളം വാര്ഡ് കൗണ്സിലറും സിപിഎം ബ്രാഞ്ച് കമ്മിറ്റി അംഗവുമായ സൗമ്യ അത്താഴമംഗലം വാര്ഡിലെ സിപിഎം റിബല് സ്ഥാനാര്ത്ഥിയായി മത്സരിക്കുന്നു. ഇക്കുറി സൗമ്യയുടെ പേര് സിപിഎം ഒഴിവാക്കിയതില് പ്രതിഷേധിച്ചാണ് പാര്ട്ടി റിബലായി മത്സരിക്കുന്നത്.
എംഎല്എ കെ.ആന്സലന്റെ വാര്ഡായ വഴുതൂരില് മത്സരിക്കുന്ന സിപിഎം ഏര്യാ കമ്മിറ്റി അംഗം പി.രാജനെതിരെ വാര്ഡിലെ സിപിഎം നേതൃത്വം രംഗത്തെത്തി. സ്ഥാനാര്ത്ഥിയെ എംഎല്എ കെട്ടിയിറക്കിയതിലും, രാജന്റെ അടുത്ത ബന്ധു സമ്പത്ത് ആലംപൊറ്റ വാര്ഡില് സിപിഎം റിബലായി മത്സരിക്കുന്നതില് പ്രതിഷേധിച്ചുമാണ് വിഭാഗീയത രൂപപ്പെട്ടത്. ഊരൂട്ടുകാല വാര്ഡിലെ മുന് സിപിഎം കൗണ്സിലറും, ബ്രാഞ്ച് കമ്മിറ്റി അംഗവുമായിരുന്ന ശ്രീകണ്ഠന് തനിക്ക് ഇക്കുറി സീറ്റ് നിഷേധിച്ചതില് പ്രതിഷേധിച്ചാണ് റിബലായി മത്സരിക്കുന്നത്.
ആലംപൊറ്റ വാര്ഡില് സിപിഎം സ്ഥാനാര്ഥി എം ജയകുമാറിനെതിരെ സിപിഎമ്മിലെ തന്നെ സമ്പത്ത് റിബലായി മത്സരിക്കുന്നു. അമരവിള വാര്ഡില് സിപിഐക്കെതിരെ സിപിഎമ്മിന്റെ റിബല് സ്ഥാനാര്ത്ഥിയും മത്സര രംഗത്തെത്തി. സിപിഐയിലെ സജിക്കെതിരെ സിപിഎം ബ്രാഞ്ച് സെക്രട്ടറിയും പട്ടികജാതി ക്ഷേമസമിതി ലോക്കല് കമ്മിറ്റി സെക്രട്ടറിയുമായ ബിജുവാണ് റിബല് സ്ഥാനാര്ത്ഥിയായി മത്സരിക്കുന്നത്. സിപിഐയുടെ സീറ്റായ അമരവിള പിടിച്ചെടുക്കാന് സിപിഎം കഴിഞ്ഞ തവണയും ശ്രമം നടത്തിയിരുന്നു.
