ചെറുവത്തൂര്: സിപിഎം ലോക്കല് കമ്മറ്റി അംഗത്തിന്റെ ഉടമസ്ഥതയിലുള്ള ലോഡ്ജില് പെണ്വാണിഭം നടക്കുന്നതായി രഹസ്യവിവരം ലഭിച്ചതിനെ തുടര്ന്ന് പോലീസ് മിന്നല് പരിശോധന നടത്തി. ചെറുവത്തൂര് പഴയ ദേശീയപാതയ്ക്ക് അടുത്തുള്ള ഗവ.ആശുപത്രി സമീപത്തെ മലബാര് ലോഡ്ജില് നിന്നാണ് ആറ് അന്യ സംസ്ഥാനക്കാരികളായ യുവതികളെ രക്ഷപ്പെടുത്തിയതെന്ന് പോലീസ് വൃത്തങ്ങള് പറയുന്നു. സംഭവവുമായി ബന്ധപ്പെട്ട് ലോഡ്ജ് ഉടമയ്ക്കും നടത്തിപ്പുകാരിക്കുമെതിരെ ചന്തേര പോലീസ് സ്വമേധയാ കേസെടുത്ത് അന്വേഷണം ആരംഭിച്ചിരിക്കുകയാണ്. കാഞ്ഞങ്ങാട് ഡിവൈഎസ്പി സുരേഷ് ബാബുവിന്റെ നിര്ദ്ദേശപ്രകാരം ചന്തേര പോലീസ് ഇന്സ്പെക്ടര് കെ.പ്രശാന്തിന്റെ നേതൃത്വത്തില് നടത്തിയ പ്രത്യേക ഓപ്പറേഷനിലാണ് അസാന്മാര്ഗിക പ്രവര്ത്തനങ്ങള് കണ്ടെത്തിയതെന്ന് അധികൃതര് വ്യക്തമാക്കി തിങ്കളാഴ്ച രാത്രി 7.30 ഓടെയായിരുന്നു പരിശോധന.
പോലീസ് അകത്ത് പ്രവേശിക്കുമ്പോള് ലോഡ്ജിലെ മുറികളില് ആറ് യുവതികളും അസാന്മാര്ഗിക പ്രവര്ത്തനങ്ങള്ക്കായി എത്തിയ കണ്ണൂര്- കാസര്കോട് ജില്ലകളിലെ മൂന്ന് പുരുഷന്മാരും ഉണ്ടായിരുന്നതായാണ് പോലീസ് റിപ്പോര്ട്ട്. ഇവരെല്ലാവരെയും പോലീസ് കസ്റ്റഡിയിലെടുത്തു. വ്യഭിചാര പ്രവര്ത്തനങ്ങള് നടത്തിയതായി പരാതി ലോഡ്ജ് നടത്തിപ്പുകാരനായ മുഹമ്മദ് അസൈനാറിന്റെ അറിവോടെയും സഹായത്തോടെയും സാമ്പത്തിക ലാഭത്തിനായി യുവതികളെ ഉപയോഗിച്ച് വ്യഭിചാര പ്രവര്ത്തനങ്ങള് നടത്തിവരുന്നതായാണ് പോലീസിന് ലഭിച്ച പരാതി.
ലോഡ്ജ് നടത്തിപ്പുകാരിയായ ആദുര് പോലീസ് സ്റ്റേഷന് പരിധിയിലെ നസീമ (47) യുവതികളെ എത്തിക്കുന്നതിലും ഇടപെടലുകളിലും സജീവമായിരുന്നുവെന്നും അന്വേഷണ സംഘം റിപ്പോര്ട്ട് ചെയ്തു.കാഞ്ഞങ്ങാട് ഡിവൈഎസ്പി സുരേഷ് ബാബുവിന്റെ നേതൃത്വത്തിലുള്ള സംഘമാണ് പരിശോധന നടത്തിയത്. പരിശോധനയില് ലോഡ്ജ് രജിസ്റ്റര് ബുക്ക് ഉള്പ്പെടെയുള്ള രേഖകളും മറ്റ് വസ്തുക്കളും പോലീസ് ബന്തവസ്സിലെടുത്തിട്ടുണ്ട്. ഇന്സ്പെക്ടര് കെ.പ്രശാന്തിന്റെ നേതൃത്വത്തിലാണ് തുടരന്വേഷണം നടക്കുന്നത്.
പ്രതികളുടെ മൊബൈല് ഫോണ്, സന്ദര്ശക ബുക്ക് എന്നിവ ഉള്പ്പെടെ വിശദമായി പരിശോധിക്കുന്നുണ്ട്. കൂടുതല് ആളുകള്ക്ക് സംഭവത്തില് പങ്കുണ്ടോയെന്നും പോലീസ് അന്വേഷിക്കുന്നുണ്ടെന്ന് ഡിവൈഎസ്പി സുരേഷ് ബാബു വ്യക്തമാക്കി.
