സിബിന്‍ ഹരിദാസ്
വെയില്‍ തിളയ്‌ക്കുകയാണ്. പുറത്തേക്കാളധികം ചൂട് വീടിന് അകത്താണ്. അവിടെ നീണ്ട സംസാരം തുടരുകയാണ്. ഇടയ്‌ക്ക് ചില മൗനം. വീണ്ടും തുടരുന്ന സംസാരം .
അയാള്‍ തന്നെ പരിഗണിക്കുന്നില്ല എന്നതായിരുന്നു അവളുടെ പരാതി.
അവള്‍ തന്റെ തിരക്കുകള്‍ മനസ്സിലാക്കി ഒപ്പം നി
ല്‍ക്കുന്നില്ലെന്ന് അയാളും.
മടുത്തു. ഇനി വയ്യെന്ന് രണ്ടു പേരും.
രമ്യതയിലെത്തിക്കുവാന്‍ ശ്രമിച്ചവര്‍ ഒടുവില്‍ പറഞ്ഞു – നിങ്ങള്‍ പറയുന്നത് നിങ്ങള്‍ക്ക് തന്നെ മാത്രമേ മനസ്സിലാവുന്നുള്ളൂ . പ്രശ്‌നമുണ്ടെങ്കിലേ പരിഹാരമുള്ളൂ. നിങ്ങള്‍ക്കിടയിലെ പ്രശ്‌നമെന്തെന്ന് ഞങ്ങള്‍ക്കിനിയും അറിയില്ല. ഇനി നിങ്ങടെ ഇഷ്ടം പോലെ.
വന്നവര്‍ പടികടന്നിറങ്ങി. പല തവണ വന്നവരൊക്കെയും ഇതു തന്നെയാണ് ഒടുവില്‍ പറഞ്ഞത്.
എന്താണ് പ്രശ്‌നം?
എന്നാണ് തുടങ്ങിയത് ?
ഈ ചോദ്യങ്ങള്‍ക്ക് മുന്‍പില്‍ മറുപടിയില്ലാതെ അയാളും അവളും മൗനം കുടിച്ചിരുന്നു.
പക്ഷെ അവര്‍ക്കിടയില്‍ വലിയ പ്രശ്‌നമായിരുന്നു. പറഞ്ഞു കാണിക്കാന്‍ കഴിയാത്ത പ്രശ്‌നം.
ഒടുവില്‍ അവര്‍ ഉറപ്പിച്ചു. പിരിയാം.
നഗരത്തിലെ അറിയപ്പെടുന്ന വക്കീലിനെ തന്നെ കണ്ടു.
രണ്ടു പേരേയും കേട്ടു കഴിഞ്ഞപ്പോള്‍ വക്കീല്‍ ചോദിച്ചു- എന്താണ് നിങ്ങള്‍ക്കിടയിലെ പ്രശ്‌നം ?
മറുപടിയില്ല .
പിരിയണം- രണ്ടു പേരും ഒരേ സ്വരത്തില്‍ പറഞ്ഞു.
ശരി, നിങ്ങളുടെ ഇഷ്ടം പോലെ.
വക്കീല്‍ പിന്നെ ഒന്നും പറഞ്ഞില്ല .
പരസ്പര സമ്മതത്തോടെ പിരിയുവാനുള്ള തീരുമാനത്തില്‍ അവര്‍ രണ്ടു പേരും ഒപ്പുവെച്ചു .
തിരിച്ച് വീട്ടിലെത്തിയവര്‍ പിന്നെ ഒന്നും മിണ്ടിയില്ല. മുന്‍പത്തെ പോലെ രണ്ടു ചേരാത്ത ധ്രുവങ്ങളായി തന്നെ നിന്നു .
ഇടയ്‌ക്ക് നടന്ന കൗണ്‍സിലിംഗ് ശ്രമങ്ങള്‍ വഴിപാടായി .
ഇപ്പോള്‍ വരുന്നവരില്‍ ഏറെയും നിങ്ങളെപ്പോലെ തന്നെയാണെന്ന് കൗണ്‍സിലര്‍ ഒരു വലിയ ദീര്‍ഘ നിശ്വാസത്തിന് ശേഷം പറഞ്ഞു .
അവര്‍ രണ്ടു പേര്‍ക്കും മൗനം.
കോടതിയില്‍ കേസ് എടുക്കുന്ന ദിവസം അയാളും അവളും വേഗത്തില്‍ വീട്ടില്‍ നിന്നിറങ്ങാന്‍ തുടങ്ങി.
വാതില്‍പ്പടിയില്‍ രണ്ടു മക്കള്‍.
അവരെ രണ്ടു പേരെയും മക്കള്‍ മാറി മാറി നോക്കി.
പിരിയുന്നത് നിങ്ങളുടെ അവകാശമായിരിക്കാം. പക്ഷെ അച്ഛനും അമ്മയ്‌ക്കും ഒപ്പം കഴിയുക എന്നത് ഞങ്ങളുടെ അവകാശമാണ്- രണ്ടു മക്കളുടെയും ശബ്ദത്തിന് നല്ല കനമുണ്ടായിരുന്നു.
വെയിലിനപ്പോള്‍ കനം കുറഞ്ഞു തുടങ്ങി.
അയാളുടെയും അവളുടെയും ഇടയില്‍ നിന്ന് പ്രശ്‌നം പെട്ടെന്ന് ഇറങ്ങിപ്പോയി.
