കുമ്പള: ബിജെപിയെ പരാജയപ്പെടുത്താന്‍ കേരളത്തിലും ഇടത്-വലത് സംഖ്യകക്ഷികള്‍ ഒരു മുന്നണിയായി മത്സരിക്കുന്ന കാലം വിദൂരമല്ലെന്ന് ബിജെപി ജില്ലാ പ്രസിഡന്റ് എം.എല്‍. അശ്വിനി പറഞ്ഞു. ബിജെപി കുമ്പള പഞ്ചായത്ത് തെരഞ്ഞെടുപ്പ് കമ്മറ്റി ഓഫീസിന്റെ ഉദ്ഘാടനം നിര്‍വ്വഹിക്കുകയായിരുന്നു അവര്‍.
ബിഹാര്‍ ഉള്‍പ്പെടെ ഒട്ടുമിക്ക സംസ്ഥാനങ്ങളിലും കോണ്‍ഗ്രസും ഇടത് മുന്നണിയും മറ്റു പ്രതിപക്ഷ പാര്‍ട്ടികളും ഒറ്റക്കെട്ടായി മത്സരിച്ചിട്ടും ദേശീയ ജനാധിപത്യ സഖ്യത്തെ പരാജയപ്പെടുത്താന്‍ സാധിക്കാത്തതിന് കാരണം നരേന്ദ്ര മോദി സര്‍ക്കാര്‍ നടപ്പാക്കിയ ജനക്ഷേമ പദ്ധതികളും വികസനവുമാണ്.
കുമ്പള പഞ്ചായത്ത് ഭരണ സമിതി സമ്പൂര്‍ണ്ണ പരാജയമാണെന്നും 5 വര്‍ഷത്തെ ദുര്‍ഭരണത്തിന്റെ ബാക്കി പാത്രമാണ് കുമ്പള നഗരത്തില്‍ ഉള്‍പ്പെടെ കുടിവെള്ളം മുട്ടിയതെന്നും അശ്വിനി പറഞ്ഞു. ബിജെ പി സംസ്ഥാന സമിതി അംഗം വി.രവീന്ദ്രന്‍ പതാക ഉയര്‍ത്തി.
കുമ്പള പഞ്ചായത്ത് സൗത്ത് ഏരിയകമ്മറ്റി പ്രസിഡന്റ് സുജിത്‌റൈ അദ്ധ്യക്ഷനായി. ജില്ലാ ജനറല്‍ സെക്രട്ടറി പി. ആര്‍. സുനില്‍, വൈസ് പ്രസിഡന്റ് മുരളീധര്‍ യാദവ്, മണ്ഡലം പ്രസിഡന്റ് സുനില്‍ അനന്തപുരം, കുമ്പള പഞ്ചായത്ത് നോര്‍ത്ത് ഏരിയ കമ്മറ്റി പ്രസിഡന്റ് ശിവപ്രസാദ് റൈ, ഒബിസി മോര്‍ച്ച ജില്ലാ ജനറല്‍ സെക്രട്ടറി ദയാനന്ദ, മഹിളാമോര്‍ച്ച ജനറല്‍ സെക്രട്ടറി എസ്.പ്രേമലത എന്നിവര്‍ സംസാരിച്ചു.
