മലപ്പുറം: ഭാരത ഫുട്‌ബോള്‍ ടീം സ്‌ട്രൈക്കറും കേരള ബ്ലാസ്റ്റേഴ്‌സ് എഫ്സി മുന്‍ താരവുമായ ഇഷാന്‍ പണ്ഡിത സൂപ്പര്‍ ലീഗ് കേരളയില്‍ മലപ്പുറം എഫ്‌സിക്കായി ബൂട്ടണിയും.
സൂപ്പര്‍ ലീഗ് കേരളയിലെ ശേഷിക്കുന്ന മത്സരങ്ങളില്‍ ടീമിന്റെ അറ്റാക്കിംഗ് കൂടുതല്‍ ശക്തമാക്കുന്നതിന് വേണ്ടിയാണ് താരത്തെ ഇപ്പോള്‍ എംഎഫ്‌സി സൈന്‍ ചെയ്തിരിക്കുന്നത്. ഇന്ത്യന്‍ സൂപ്പര്‍ ലീഗ് ക്ലബുകള്‍ക്ക് പുറമെ സ്പാനിഷ് ലീഗിലും ഇഷാന്‍ പന്ത് തട്ടിയിട്ടുണ്ട്. ദല്‍ഹി സ്വദേശിയായ താരത്തിന് 27 വയസ്സാണ് പ്രായം. സീസണില്‍ ആദ്യമായാണ് വിദേശത്തുനിന്നല്ലാത്തൊരു മലയാളി ഇതര താരത്തെ മലപ്പുറം സൈന്‍ ചെയ്തിരിക്കുന്നത്.
ഐഎസ്എല്ലില്‍ എഫ്സി ഗോവ, ജംഷഡ്പൂര്‍ എഫ്സി, കേരള ബ്ലാസ്റ്റേഴ്‌സ് എഫ്സി തുടങ്ങിയ ടീമുകള്‍ക്കായി കളത്തിലിറങ്ങിയിട്ടുണ്ട്. ഗോവയ്‌ക്ക് വേണ്ടി 17 മത്സരങ്ങളില്‍ നിന്ന് നാല് ഗോളുകളും, ജംഷഡ്പൂരിന് വേണ്ടി 36 മത്സരങ്ങളില്‍ നിന്ന് ആറ് ഗോളുകളും, ബ്ലാസ്റ്റേഴ്‌സിന് വേണ്ടി 21 മത്സരങ്ങളില്‍ നിന്ന് രണ്ട് ഗോളുകളും നേടിയിട്ടുണ്ട്. ഭാരതത്തിനായി എട്ട് മത്സരങ്ങളില്‍ നിന്ന് ഒരു ഗോള്‍ നേടി. 2023ലെ എഎഫ്സി ഏഷ്യന്‍ കപ്പ് യോഗ്യതാ മത്സരത്തില്‍ ഹോങ്കോങ്ങിനെതിരെയായിരുന്നു ഇഷാന്റെ അന്താരാഷ്‌ട്ര ഗോള്‍. 2023ല്‍ ഇന്റര്‍കോണ്ടിനെന്റല്‍ കപ്പ് ജേതാക്കളായ ഇന്ത്യന്‍ ടീമംഗം കൂടിയായിരുന്നു താരം.
ഇഷാന്റെ യൂത്ത് കരിയര്‍ കൂടുതലും ചെലവഴിച്ചത് സ്പെയിനിലായിരുന്നു. അല്‍കോബെന്‍ഡാസ്, യുഡി അല്‍മേരിയ, സിഡി ലെഗാനസ്, ജിംനാസ്റ്റിക്‌സ് ടാരഗോണ, ലോര്‍ക്ക എഫ്സി, പോബ്ല ഡി മാഫുമെറ്റ് തുടങ്ങിയ സ്പാനിഷ് ക്ലബ്ബുകള്‍ക്കായും താരം പന്ത് തട്ടിയിട്ടുണ്ട്. ഒരു സ്പാനിഷ് ടോപ്പ് ഡിവിഷന്‍ ക്ലബ്ബിന്റെ യൂത്ത് ടീമിനായി കളിക്കുന്ന ആദ്യ ഇന്ത്യക്കാരന്‍ കൂടിയാണ് ഇഷാന്‍.
