ന്യൂദല്ഹി: കൂടുതല് കൃത്യതയോടെ ലക്ഷ്യത്തിലെത്തുന്ന ലേസര് ഗൈഡഡ് ടാങ്ക് വേധ മിസൈലുകള് വാങ്ങാനൊരുങ്ങി സൈന്യം. ടാങ്ക് വേധ മിസൈലുകള് വാങ്ങുന്നതിനായി പ്രതിരോധ മന്ത്രാലയം സര്ക്കാര് ഉടമസ്ഥതയിലുള്ള ഭാരത് ഡൈനാമിക്സ് ലിമിറ്റഡുമായി 2095.70 കോടി രൂപയുടെ കരാറില് ഒപ്പിട്ടു. സൈന്യത്തിന്റെ ആയുധശേഷി വര്ധിപ്പിക്കുകയെന്ന ലക്ഷ്യത്തോടെ ‘ഇന്വാര്’ ടാങ്ക് വേധ മിസൈലുകളാണ് വാങ്ങുക.
ഇന്വാര് ടാങ്ക് വേധ മിസൈലുകളുടെ സംഭരണം ടാങ്ക് ടി-90 ന്റെ ആക്രമണശക്തിയും പ്രഹരശേഷിയും വര്ധിപ്പിക്കും. ഇത് സൈന്യത്തിലെ കവചിത റെജിമെന്റുകളുടെ പ്രധാന ആശ്രയമായി മാറും, പ്രതിരോധമന്ത്രാലയം ഔദ്യോഗിക പ്രസ്താവനയില് അറിയിച്ചു.
സൈന്യത്തിന്റെ ആവശ്യങ്ങള് നിറവേറ്റുന്നതിനായി പൊതുമേഖലയിലെ സ്ഥാപനങ്ങളുടെ വൈദഗ്ധ്യം ഉപയോഗപ്പെടുത്താനുള്ള സര്ക്കാര് തീരുമാനമാണ് ഇത്തരമൊരു കരാറിനു പിന്നില്.
ഒപ്പം, പുതിയ സാങ്കേതിക വിദ്യകള് വികസിപ്പിക്കുന്നതിലൂടെ പ്രതിരോധമേഖലയില് ഭാരതത്തിന് സ്വയംപര്യാപ്തത കൈവരിക്കാനാകുമെന്നും പ്രതിരോധമന്ത്രാലയം അറിയിച്ചു.
