ന്യൂദല്ഹി: ചൈനയുമായുള്ള അതിര്ത്തിക്കടുത്തുള്ള വ്യോമസേനയുടെ വിമാനത്താവളമായ ന്യോമ പ്രവര്ത്തന ക്ഷമമായി. ഇന്നലെ വ്യോമസേനാ മേധാവി എയര്മാര്ഷല് എ.പി. സിങ് സി 130 ജെ ഹെര്ക്കുലീസ് വിമാനത്തില് ഇവിടെ ലാന്ഡ് ചെയ്തു. വ്യോമസേനയുടെ ഏറ്റവും വലിയ ചരക്ക്, യാത്ര വിമാനമാണിത്.
നിയന്ത്രണരേഖയിലേക്ക് ഇവിടെ നിന്ന് 25 കിലോമീറ്റര് അകലമേയുള്ളു. ഇതോടെ ഇനി അതിര്ത്തിയിലേക്ക് സൈനികരെയും യുദ്ധോപകരണങ്ങളും എത്തിക്കാന് വളരെ എളുപ്പം കഴിയും. 3,488 കിലോമീറ്റര് ദൈര്ഘ്യമുള്ള നിയന്ത്രണരേഖക്കടുത്ത്, 13,000 അടി ഉയരത്തിലാണ് വിമാനത്താവളം. രാജ്യത്തെ ഏറ്റവും ഉയരത്തിലുള്ള രണ്ടാമത്തെ വ്യോമത്താവളമാണിത്. 16,700 അടി ഉയത്തിലുള്ള, ലഡാക്കിലെ ദൗലത് ബെഗ് ഓള്ഡിയെന്ന എയര് സ്ട്രിപ്പാണ് ഭാരതത്തിലെ മാത്രമല്ല ലോകത്തിലെ തന്നെ ഏറ്റവും ഉയരത്തിലുള്ള വിമാനത്താവളം.
ലേ, കാര്ഗില്, തോയിസ് എന്നിവയ്ക്കൊപ്പം ന്യോമ പ്രവര്ത്തിക്കും. കാര്ഗോ യാത്രാ വിമാനങ്ങളുടെയും യുദ്ധവിമാനങ്ങളുടെയും പ്രവര്ത്തനങ്ങള് കൈകാര്യം ചെയ്യാനും നിലനിര്ത്താനും വ്യോമതാവളത്തിന് ശേഷിയുണ്ട്.
230 കോടിയുടെ നവീകരണ പ്രവര്ത്തനങ്ങളാണ് ന്യോമ വ്യോമതാവളത്തില് നടന്നത്. പ്രതിരോധ മന്ത്രി രാജ്നാഥ് സിങ് 2023ലാണ് പദ്ധതിക്ക് തറക്കല്ലിട്ടത്. ലഡാക്കിലെ നാലാമത്തെ വ്യോമസേനാ താവളമാണിത്. 10,500 അടി ഉയരത്തിലുള്ള കാര്ഗില് എയര് സ്ട്രിപ്പിനേക്കാള് ഉയരത്തിലാണിത്. ബോര്ഡര് റോഡ് ഓര്ഗനൈസേഷനാണ് എയര് സ്ട്രിപ്പ് പണിതത്. തണുപ്പുകാലത്ത് മൈനസ് 30 ഡിഗ്രിവരെ എത്തുന്ന തണുപ്പാണിവിടെ. വെറും മൂന്നു വര്ഷം കൊണ്ടാണ് പണിതീര്ത്തത്. കൂറ്റന് വിമാനങ്ങള് മുതല് സുഖോയ് പോലുള്ള യുദ്ധവിമാനങ്ങള്ക്കു വരെ ഇവിടെ ലാന്ഡ് ചെയ്യാന് കഴിയും.
