തിരുവനന്തപുരം: മെഡിക്കല് കോളജ് ആശുപത്രിയില് കാത്ത് ലാബുകളുടെ കുറവായതിനാലാണ് കൃത്യസമയത്ത് ചികിത്സ ലഭിക്കാതെ പത്മന സ്വദേശി വേണു മരിച്ചതെന്ന് മെഡിക്കല്കോളജ് മുന് കൗണ്സിലറുടെ പരാതി. ജി. ശ്രീകുമാര്. എസ് സി/എസ് ടി കമ്മീഷന് നല്കിയ പരാതിയിലാണ് ഇക്കാര്യം പറഞ്ഞിട്ടുള്ളത്.
പരിശോധനകള് അടിയന്തിര സ്വഭാവത്തില് വേണുവിന് ലഭ്യമാക്കാത്ത കാത്ത് ലാബ് ജീവനക്കാര്ക്കെതിരെ കര്ശന നടപടിയെടുക്കണമെന്നും മുന് കൗണ്സിലര് ജി. ശ്രീകുമാറിന്റെ പരാതിയിലുണ്ട്. മെഡിക്കല് കോളജ് ആശുപത്രിയില് വികസന സമിതിയുടെ കീഴിലുള്ള ഒരു കാത്ത് ലാബ് മാത്രമാണുള്ളത്. ഇവിടെ പ്രവര്ത്തിച്ചിരുന്ന കെഎച്ച്ആര്ഡബ്ലിഎസിന്റെ കീഴിലുള്ള കാത്ത് ലാബ് ഒന്നര വര്ഷമായി അടച്ചു പൂട്ടിയ നിലയിലാണ്. ഇത് അറ്റകുറ്റപ്പണി തീര്ത്ത് പ്രവര്ത്തനയോഗ്യമാക്കാന് അധികൃതര് തയ്യാറായിട്ടില്ല.
മള്ട്ടി സ്പെഷ്യാലിറ്റി ബ്ലോക്കില് കാത്ത് ലാബ് ആരംഭിക്കുന്നതിനുള്ള സജ്ജീകരണം പൂര്ത്തിയാക്കിയെങ്കിലും പ്രവര്ത്തന യോഗ്യമാക്കിയിട്ടില്ല. ഒന്പത് വര്ഷമായി ഇതും അടഞ്ഞ നിലയിലാണ്. രോഗികളുടെ ക്രമാതീതമായ വര്ദ്ധന കണക്കിലെടുത്ത് ഒന്നിലധികം കാത്ത് ലാബുകള് സ്ഥാപിക്കാന് ആരോഗ്യവകുപ്പോ ആശുപത്രി അധികൃതരോ തയ്യാറാകുന്നില്ലെന്നും ആരോപണം.
