ന്യൂദല്‍ഹി : തദ്ദേശീയമായി നിര്‍മ്മിച്ച ക്വാണ്ടം സെക്യൂരിറ്റി ചിപ്- ക്വൂ, എസ് ഐ പി, രാജ്യത്തെ പ്രഥമ ക്വാണ്ടം കംപ്യൂട്ടിംഗ് ചിപ്- 25 ക്യുബിറ്റ് ക്വൂ പി യു, രാജ്യത്തെ പ്രഥമ അര്‍ബുദ കോശ ചികിത്സ -സി എ ആര്‍ -ടി എന്നീ അതിനൂതന കണ്ടുപിടിത്തങ്ങള്‍ നാടിന് സമര്‍പ്പിച്ച് പ്രധാനമന്ത്രി നരേന്ദ്രമോദി. വളര്‍ന്നു വരുന്ന ശാസ്ത്ര , സാങ്കേതിക, നവീന പദ്ധതി സമ്മേളന( ഇ എസ് ടി ഐ സി2025)ത്തിലാണ് പ്രധാനമന്ത്രി ഇവ അവതരിപ്പിച്ചത്.
ഇമ്മൂണോ ആക്ട് കമ്പനി വികസിപ്പിച്ച നെസ്‌കാര്‍ 19 അര്‍ബുദ ചികിത്സയ്‌ക്ക് രാജ്യം ലോകത്തിന് നല്‍കിയ വലിയ സംഭാവനയാണ്. ബയോടെക്‌നോളജി വകുപ്പും(ഡി ബി ടി) ബയോടെക്‌നോളജി വ്യവസായ ഗവേഷണ സഹായ കൗണ്‍സിലും (ബി ഐ ആര്‍ എ സി)ഇതിന് പിന്തുണ നല്‍കി.
അര്‍ബുദ ചികിത്സയില്‍ വിപ്ലവകരമായ പരിവര്‍ത്തനം വരുത്തുന്ന സി എ ആര്‍ ടി ആഗോളമായി നടത്തിയ ക്ലിനിക്കല്‍ പരീക്ഷണങ്ങളില്‍ മികച്ച ഫലമാണ് നല്‍കിയത്.പ്രത്യേകിച്ചും അര്‍ബുദം അതിന്റെ അവസാന ഘട്ടത്തിലെത്തിയ രോഗികളില്‍. അക്യൂട്ട് ലിംഫോസൈറ്റിക് ലുക്കീമിയ (രക്തത്തെയും മജ്ജയെയും ബാധിക്കുന്ന അര്‍ബുദം) രോഗികളില്‍ ഈ ചികിത്സ വളരെ ഫലപ്രദമാണെന്നാണ് കണ്ടെത്തല്‍.
ജനിതക ചികിത്സ താരതമ്യേന കുറഞ്ഞ ചെലവിലും രോഗിക്ക് സുരക്ഷിതമായും നടത്താന്‍ നെക്‌സ്‌കാര്‍ 19 എന്ന മരുന്നിലൂടെ സാധ്യമാണ്.
