തിരുവനന്തപുരം: കേരളം അതിദാരിദ്ര്യമുക്തമെന്ന് മുഖ്യമന്ത്രി പിണറായി വിജയന്റെ പ്രഖ്യാപനം.ഇത് തട്ടിപ്പല്ല, യാഥാര്‍ഥ്യമാണെന്ന് മുഖ്യമന്ത്രി പ്രതിപക്ഷത്തോട് പറഞ്ഞു.
വാഗ്ദാനങ്ങള്‍ ഓരോന്നായി നടപ്പാക്കുന്നതിന്റെ ചാരിതാര്‍ഥ്യം സര്‍ക്കാരിനുണ്ടെന്നും മുഖ്യമന്ത്രി. നവകേരള സാക്ഷാത്ക്കാരത്തിനുള്ള ചവിട്ടുപടിയാണിത്.ലൈഫ് ഭവന്‍ പദ്ധതിയിലൂടെ 4,70,000 വീടുകള്‍ യാഥാര്‍ഥ്യമാക്കി. ജനം സന്തുഷ്ടരാണെന്നും തിരുവനന്തപുരം സെന്‍ട്രല്‍ സ്റ്റേഡിയത്തിലെ പരിപാടിയില്‍ അദ്ദേഹം പറഞ്ഞു.
സംസ്ഥാനത്തെ അതിദാരിദ്ര്യ മുക്തമാക്കാനുളള പ്രവര്‍ത്തനങ്ങള്‍ക്ക് തുടക്കം മുതല്‍ ഒടുക്കം വരെ ഫലപ്രദമായി ഇടപെട്ടത് നാട്ടിലെ തദ്ദേശ സ്വയംഭരണ സ്ഥാപനങ്ങളാണ്.എല്ലാവരും ഒരേ മനസോടെ അതില്‍ സഹകരിച്ചുവെന്ന് മുഖ്യമന്ത്രി പറഞ്ഞു.
കേരളത്തില്‍ ഇടവേളകളില്‍ അധികാരത്തില്‍ വന്ന ഇടതുപക്ഷ പുരോഗമന സര്‍ക്കാരുകള്‍ നവകേരളം വാര്‍ത്തെടുക്കുന്നതിനുള്ള പ്രവര്‍ത്തനങ്ങള്‍ക്ക് നേതൃത്വം നല്‍കി. കേരള മോഡല്‍ എന്ന രീതിയില്‍ ലോകം വിശേഷിപ്പിച്ച കാര്യങ്ങള്‍ക്ക് ഇടയാക്കിയത് ഇത്തരത്തിലുള്ള ഇടപെടലുകളാണെന്ന് മുഖ്യമന്ത്രി പറഞ്ഞു.
കുടുംബശ്രീക്കു പകരം ജനശ്രീ എന്ന സംവിധാനം കൊണ്ടുവരാന്‍ ശ്രമിച്ചതും നമ്മുടെയെല്ലാം അനുഭവത്തില്‍ ഉള്ളതാണ്.സംസ്ഥാനത്തെ വികസിത രാജ്യങ്ങളോട് കിടപിടിക്കുന്ന തരത്തിലേക്ക് ഉയര്‍ത്തുക എന്നതാണ് നവകേരള നിര്‍മിതിയുടെ സുപ്രധാന ലക്ഷ്യം. ആ ലക്ഷ്യം ഏറെ അകലെയല്ലെന്നും മുഖ്യമന്ത്രി പറഞ്ഞു.
അതേസമയം, അതിദാരിദ്ര്യമുക്തി പ്രഖ്യാപനം തട്ടിപ്പാണെന്ന് ബി ജെ പിയും കോണ്‍ഗ്രസും വിമര്‍ശിച്ചു.
